E ui i uiga loulouā o le tau e lei avea ma tulaga e taofia ai le faamoemoe o le aiga o Tanuvasa Leulua’ititia’i i Nofoalii.
E 20 nofo i le suafa Tanuvasa ma le silia i le 100 matai tulafale o le aiga. Na faailoa e Iuni Tanuvasa Stowers o se sui o lea aiga o le taimi muamua lea ua tatala ai le suafa Tanuvasa i lo latou aiga.
“O le faavae lava ia o le aiga e fā lava Tanuvasa e tausia Sagamea-uta ma Sagamea-tai, peitai ua vaai i le uluola o le aiga i fanau, lea ua tatala ai le faavae o le aiga, sa agai foi i le faamasinoga ona o le manatu lava o nisi suli e tatau ona faaauau pea le faavae na sau a’i tuaa ua mavae, peitai ua mafuli lava i le tatala o le suafa.”
O le faapaiaga o nofo sa faia lea i le malumalu EFKS i Nofoalii lava, ma faataunuu ai le faafotutupu ma nofo. Na ta’ua foi e toalua tamaitai ua saofagā ma ua pale mai i le suafa Tanuvasa.
Na faailoa foi e le susuga Tomasi Peni o se alii ofisa i le ILO o loo nofo ai i le suafa Laufiso lona agaga faagaeetia. “O le faaaloalo o le mea tāua ma e faafetaia lo’u aiga i le faaeaea ae o le faaeaea e omai faatasi ma le tautua ma le auaunaga, auā manuia mo le aiga ma le afioaga.”
O le taimi lenei i tausaga taitasi e vaaia ai le agai mai o aiga mai fafo e faia matai, sa fesiligia foi le lagona o le tina ia Iuni i le faasalafa o Suafa. “O se mea lelei, ae o se tulaga e lē lelei foi, i lona itu lelei ua toatele aiga faatusa atu i aso la sa toaitiiti e lava i le tasi pe lua matai sa’o, taimi nei ua uluola, e aoga foi e fealofani ai aiga.
O lona itu lē lelei pe afai o le a alu lava le suafa ia ma ana matai tulafale lea ua faia i le asō e tautua lava lo latou matai, talosia ae leai se tulaga faapena e tulai mai.”
O suafa Tanuvasa e 20 na faia e tofu lava ma ana matai tulafale ta’i 10. O se faamoemoe sa malaga mai ai suli ma feoi o le suafa Tanuvasa mai atunuu mamao, e opogi ma faamamalu le faafotu i le suafa Tanuvasa o le Laau-na-fausia, o le tamaloa na itulua ai A’ana ae na toe atoa foi i ai A’ana.
