E lei ofi le potu faamasino numera muamua i le Faamasinoga Maualuga i Mulinuu i le taeao o le Aso Gafua 23 o Tesema 2019, i aiga o uo ma ē masani sa molimauina le faatautoga o faamasino e toafitu o le Faamasinoga o Fanua ma Suafa.
O i latou ua tofia e aofia ai Afemaleta Tiavaasu’e Alesana Lafi, Lealiie’e Tuaimalo Asamu Ah Sam, Feagaimaali’i Nanai Malaelua Sua, Tuloa Fetufou Aiono, Aveau Tuala Lepale Niko Palamo, Laulu Seuamuli Enele Taefu, ma Luafalealo Lilo Mikaele Tofete. Na ta’ua o se taimi muamua lea ua toatele ai se auvaa o faamasino faatautoina mo le Faamasinoga o Fanua ma Suafa.
O le Susuga i le Faifeau Toeaina Malolo Manumalo ia Utufua Naseri sa taitaia lea sauniga. Na auai le Alii Palemia, Susuga Tuilaepa Lupesoliai Sailele Malielegaoi, o le afioga i le Sui Faamasino Sili ia Vui Clearance Nelson na ia taitaia, atoa ma le laulau o le faamasinoga i alii ma tamaitai.
O upu faamamafa o le lauga a le toeaina ia Utufua Naseri mo faamasino fou, “E lē faigofie le valaauina e fai ma Faamasino, ae o le finagalo o le Atua lea ua mafua ai ona iai lea tofiga.”
Aua e te faapi’oina le Faamasinoga
“Leaga o le faapioina o le faaiuga o mea ua filifili i ai le loto o le Faamasino, a e filifili loa o le a faasese le iuga e sese ai, ona lagona ai lea o le iuleo lea sa ou faitau ai i le pepa, ina ua faamalolo nai uso talu ai nei ona o vaivaiga. Faafetai ua talia le tagi mai o tuaa i le tuugamau, sa latou taumafai i le amiotonu mo o latou aiga ae ua lē maua.”
Aua e te faailogaina se tasi
“O le isi lea o mafuaaga malosi ua sese ai le faamasinoga, o le silasila mai o le Faamasino, o le itu faamasino lea o loo nofo mai ai le tagata maualuga o le malo, tagata maualuga o le Ekalesia, tagata o lona aiga, ia ona fai lea o le faaiuga ua faapito i le tagata lea.”
Aua ne’i talia se meaalofa
“Leaga e faatauasoina ai mata o ē popoto, poo le ā foi lou poto e faatauaso ou mata e le meaalofa, aua le talia le meaalofa, leaga e tauaso ai lou atamai mai le Atua e faatino ai le amiotonu.”
O le saunoaga a le alii Sui Faamasino Sili ia Vui Clearance Nelson, sa ia taua ai e 40 tausaga o avea o ia ma loia ma lotea mataupu tau faamasinoga ma le tulafono, toeitiiti 20 tausaga o avea nei ma faamasino. “Aua lava ne’i manatu a’e se isi o se avanoa lenei e faapasi ai le taimi, ma tuli tausaga o totoe a’o lei litaea, o le a faaopoopo foi faaosoosoga ma tofotofoga ona e lē moe le fili ia tou afioga, o le a taumafai foi nisi e faatau ma faaalatua la outou faatofalaiga, ae ia manatua la outou tautoga lea ua faatino i le asō i luma o lenei mamalu faapea le silafaga a le Silisili Ese.”
O le tofiga o i latou nei na saunoa i ai le alii Sui faamasino e faapea e lei faigofie le filifiliga o i latou nei, e toatele foi e sa valaauina, e toatele foi e na faatalanoaina e le komisi o galuega a le faamasinoga, peitai o tofiga nei ua moni ai le Atua ia Ieremia..”Na ou iloa oe ma faapaiaina oe, na ou tofia oe, ae le’i fanau mai, o lona uiga e le’o ni tofiga a tagata poo se komisi, ae o tofiga a le Atua e tauala mai tagata.”
Saunoa Vui “O le itu aupito sili ona taua, o le tautua ma le auaunaga e mafua ai le tautoga, e mo le Malo Tutoatasi, e mo Samoa ma ona tagata.”
O le vaiaso nei lea ua faamautu mai e le Ofisa Sili o Pulega o le Matagaluega o le Faamasinoga o le a faapea ona auai ai faamasino i nisi o aoaoga e faatatau lava i la latou galuega.
