Tatala le auaunaga mo nofoaafi alu i le eletise i Aukilani

Ua tatala le nofoaga fou mo nofoaafi e alu i le eletise i Aukilani i le Aso Tofi, aso 12, Setema, ma o se taimi muamua foi lea o le a faaaogāina ai nei ituaiga auala o femalagaaiga faapenei i Aukilani.
O le nofoaga fou o loo i Wiri Depot i Wiri Station Road i Manukau, ua mae‘a ma ua mautu uma mo le amatalia o lea auaunaga a le Auckland Transport i le tausaga fou. Pei ona valoia e le pulenuu o Aukilani Len Brown e faapea, ‘O le lumanai lea o Aukilani’ i le itu tau i femalagaaiga, o le a faafaigofie ai feoaiga a tagata lautele.
O nofoaafi nei o le a faaaogāina, e sui tulaga i trains tuai o loo feoai i Aukilani i le taimi nei, ma o le a amata tatala mo auaunaga i le atunuu ia Aperila o le tausaga fou, pe afai ae faamautu ma taunuu uma mai nofoaafi e 57 mai Sepania (Spain).
Tasi le nofoaafi ua taunuu mai, na fai ai le faalauiloa ma le asiasiga a le pulenuu Len Brown, faapea malo na valaaulia, i le Aso Tofi na tatala aloaia ai lenei faamoemoe, e pei ona saunoa le Taitaifono o le vaega o Femalagaaiga a Aukilani (Auckland Transport), Dr Lester Levy e faapea, ‘O se faailoga o se galuega fita ua tino mai, ua loa tausaga o fuafua ma faapolokalame, lea o le a avea ma suiga tele mo le aai lenei o Aukilani i le lumanai’.
E 70 mita le umi o le nofoafi, ma e faamoemoe e mafai ona ave ai pasese e 375, e 40 pasene ua sili ai nai lo le mamafa faatulagaina o pasese, pe a faatusa i trains o loo feoai nei i Aukilani.
Tele ni vaaiga matagofie na molimauina i nofoaafi fou, o le lautetele o faitotoa mo le faafaigofie ona ulufale ma ulufafo le pasese, o avanoa i lalo o nofoa mo ato, o taavale a tamaiti pepe, faapea se nofoaga mo taifau o loo faaaogāina mo le taitaia o nai tauaso, ia mautinoa le saogalemu mo femalagaaiga aemaise le faafaigofie ona uia e i latou e iai manaoga faapitoa. O le mamā o totonu, faapea ‘ea malulu, aemaise o security cameras mo le saogalemu o le pasese i totonu o nofoaafi fou nei. O se fuafuaga na vaai mamao i ai le vaega o Femalagaaiga a Aukilani (AT) mo le manuia o tagata lautele ma manaoga o tagata eseese.
Tagai i mamanu o loo ufi ai nofoa i totonu, e toatolu le ‘au tusiata Aukilani na nafa ma lea matafaioi, o le taumafaiga lava ia fesootai ma aganuu eseese o tagatanuu o loo nopia i ma faamautu i totonu o Aukilani.
E ui lava ina maligi timuga ma faaletonu le tau i le aso o le tatalaina o le faamoemoe, peitai e lei taofia ai le fia auai o nisi o le atunuu ma malo faaaloalogia na valaaulia faapitoa mo lenei faamoemoe.