Faamalosia fesootaiga a Samoa e lua i Vaa

O le talanoaga faaletausaga i le va o Samoa e lua lea ua fuafua i le faaiuga o le tausaga o se tasi o faamuamua o le a talanoaina ai le tulaga lea o tautua tau vaa la‘upasese ma vaa la‘uoloa.
O le taimi lenei o loo tautuaina ai e le MV Lady Naomi femalagaaiga i le va o Samoa e lua. E taitasi i le vaiaso faigamalaga nei ma na asia i le vaiaso na tea nei e le Minisita o Galuega, Felauaiga ma Atinae tetele a le Malo, Manu‘alesagalala Enokati Posala le motu i Sasa‘e i le taumafaiga lea e asia nei galuega ma auaunaga o loo avatu i Samoa nei.
O le uluai faigamalaga aloaia lenei a le Minisita i le teritori. O le MV Fotu o Samoa o loo tautuaina femalagaaiga i le va o Tutuila ma Manu‘a faapea le motu o Aonuu i taimi e moomia ai lea auaunaga.
O le MV Sili le vaa e tasi o Amerika Samoa lea ua malolo nei e lē o toe malaga ma ua agai tasi mai lava le motu o Amerika Samoa i Samoa nei mo lenei ituaiga o tautua.
O lea na toso le MV Naomi i le vaiaso atoa i Amerika Samoa lava mo le faatino ai o galuega toe faaleleia masani, ma o le feiloaiga a le alii Minisita mai i Samoa ma le Kovana o Amerika Samoa na talanoaina ai loa ma le avanoa ua tatala atu i Samoa mo alo o Amerika Samoa o loo galulue i luga o uafu aemaise vaa la‘upasese ina ia aoaoina lelei ai i le aoga o seila i totonu o Samoa.
O se folasaga ua talia e le Kovana aemaise o le iai o nisi avanoa faapea e tuu atu i le tupulaga lalovaoa o Amerika Samoa e agai i ai auā galuega e ono maua i le mae‘a ai o aoga i le teritori.
O le tulaga fou ua iai nei foi le maliega i le va o le Kamupani Vaa a Samoa le PFL ma le Neptune e faaopoopo ai femalagaaiga a Vaa la‘uoloa i atumotu o le Pasefika e aofia ai ma Amerika Samoa, o se tasi lea mafuaaga o le unai o le galulue faatasi o motu e lua i felauaiga o vaa. O Amerika Samoa le isi vaega o le Pasefika o le a faatuina ai se ofisa o le PFL ma le Neptune pe a amata le feagaiga lenei i le va o motu e lua.
E faamautu uma la nei avanoa aemaise o le tatala atu o aoaoga i Samoa nei mo fanau i Amerika Samoa.