Falepuipui i le luluu o tupe a le Westpac

O le alii talavou 23 tausaga le matua o Ulavale Val Toleafoa, sa galue i le faletupe o le Westpac Bank i Apia ua nofosala nei i le falepuipui mo le 13 masina ina ua ioe i lona luluu i se auala solitulafono o se vegatupe e 13 afe. O seleni uma ia a nisi o loo iai a latou teugatupe i lea faletupe. Faaalia i tolaulauga a le faamasinoga o i latou e alala i atunuu i fafo e pei o Niu Sila ae o loo iai a latou teugatupe i le faletupe i Samoa na agai i ai le solitulafono a le alii o Ulavale Val Toleafoa o Siumu.
O Ianuari o le tausaga nei na ia faia ai se gaioiga faapea i se teugatupe a se tasi e nofo ma aumau i fafo, lea na ia faatumu ai se pepa talatupe poo se withdrawal slip ma tusia ai le aofaiga o le seleni e fāafe tala, ona ia ave lea i se tagata faigaluega o le faletupe o se bank teller ma tala ai i tua lea seleni tele.