Ua iai nei se tusi ua oo atu i fale televise i totonu o Samoa ona o ni ata ua tuua‘ia ai nisi o ia fale i le faasalalau ae e leai ma se faatagaga.
O le tusi na aumai i le Warner Brothers ma le Paramount Pictures, nisi o fale fai ata tifaga tetele a le lalolagi i Amerika ma ua lapataia mai ai televise i totonu o Samoa ina ia taofi le toe faaali o nisi o ata e pei ona ta‘ua.
E lē taumate na iai se tasi i Samoa ua lipotia le faaali o nisi o ata i Samoa e aunoa ma le faatau mai e ia televise o le avanoa e faaali faalauaitele ai ia ata tifaga a o ata faasolo foi.
E tele polokalame ma ata ua faatau mai i ofisa o loo faatau atu ata ma o Ausetalia e iai le kamupani o loo faatauina ata ma polokalame a kamupani fai ata tifaga ma ata faasolo o televise ia o loo pueina ma faalauiloa i Amerika.
E lua kamupani tetele o loo aofia ai i le vaavaaiga a le kamupani Ausetalia lea, o le Warner Brothers ma le Paramount Pictures. E tele ma anoanoai ata tifaga o loo vaaia i lea tausaga ma lea tausaga o loo tuufaatasia e nei kamupani.
E lei mamao atu ona faaali i Samoa se tasi o ata a le Warner Brothers e faaigoaina o le World Trade Centre, o se ata tifaga na pueina ma faalauiloa i le tausaga e 2006 ma o loo autu ai le alii o Nicholas Cage i lea ata, ua toe faaali ai le mea na tupu i le osofaiga o fale tetele ia e lua i Amerika.
Na faaali uma le ata lenei i faletelevise e tolu tetele i Samoa le TVOne, TV3 ma le EFKS TV. O le ata lea na mautinoa lava na lipoti e se tasi i le kamupani Ausetalia lea ma faapea ona logo ai loa le kamupani e ana le ata.
O lea la ua iai le tusi ua oo atu i televise uma e tolu ma na maua se avanoa e fesiligia ai le EFKS TV o se televise fou ua faatuina i Samoa ma na ta‘ua e le alii Pule, Tuiasau Leota Uelese Petaia, o le ata lea na faatau sa‘o mai lava e le EFKS TV mai i le kamupani lea e i Ausetalia ma ua mae‘a la ona toe logo le kamupani Ausetalia ma faamaonia ai.
O le mau a le TVOne e leai se ata o faaali e aunoa ma le faatau mai i fafo e pei lava o le tele o isi ata ma polokalame faasolo a televise nei e pei foi o le TV3, ma o le taimi lenei o loo suesue po ua mae‘a faatau le faatagaga e faaali ai ia ata.
O le faamatalaga a Tuiasau Petaia, o le taimi lenei i ata lava ia a le EFKS TV, e faatau uma mai tifaga ma ata faasolo ma e alu ai le $2,000 tala Amerika i le tolu masina i ata ia ua ia aumai mo faasalalauga a lea fale televise.
O lana faamatalaga e taugofie mamao atu le faatau mai o ata nei mai fafo nai i lo le tuufaatasia o polokalame i Samoa ma o se auala foi e mautinoa le saogalemu ai o fale faasalalau i lenei vaitaimi.
Ua uma aso ua mavae sa mafai lava ona faatau le DVD ona faaali lea o ata e aunoa ma le amanaia mai i fafo, peitai o le tuputupu pea o fale faasalalau, ua tele foi faiga faatauvaga, aemaise o tulafono ua faamalosia nei foi i Samoa e faatatau i le soona faaaogā o fatuga, ata, pese ma soo se tomai lava e aunoa ma le faatagaga, ua vaaia ai le tele o mataupu faapenei, lea lava ua iu ina aapa ma amanaia mai ai i atunuu mamao.
O le mau a Margaret Fruean, le Ofisa Sili Lagolago o le Matagaluega o Pisinisi, Atinae ma Leipa, o i latou tonu nei ua patino i ai le vaaiga o tomai faapitoa nei ma le faaaogāina, ua tele tagi ua oo atu i le faaaogā e isi o meatotino faalemafaufau a isi, e pei o pese, upu o tala ma solo, o faailo a kamupani tetele i fafo ua lolomi ai nisi o laei i Samoa, aemaise foi ata ua pue e isi ma o le a faaauau ona vaaia nei tulaga.
O le faitioga a le Matagaluega ua tele tausaga o faalauiloa tulafono ma ua pasia ma faamalosia ae e iai lava nisi o televise nei e lē o amanaia seiloga lava ua agai ia mataupu i le faamasinoga.
Ta‘ua e Fruean, e tatau ona malamalama lelei lava televise, leitio poo nusipepa foi e lē o toe mafai ona soona faaaogā meatotino a isi e aunoa ma se faatagaga tusitusia ma e saogalemu atu le usitai o suiga ua iai nei nai i lo le fesagai ma tagi i le faamasinoga, e ono oo atu i le faitau miliona tupe e alu ai.
O loo tālia i lenei vaiaso poo fea o le a agai i ai le ata lenei ma le faitioga a le Warner Brothers.
