O le soifua tautua e ala i viiga o le susuga i le faafeagaiga taulagi ia Apouani ma le faletua ia Olevia e lē tau faailo, ona ua tele ina lausilafia i totonu o ekalesia Penetekoso ma ekalesia faaolaina e lē gata i Niu Sila a o Ausetalia e pei ona galulue ai ma avea o taitai o lea lala o le tovine i le setete o Vitoria ma le aai o Melepone, ae o le sui taitai mo le matagaluega a Ausetalia.
I lo la taunuu i Melepone i le tausaga e 1995 ma amata galulue ai, na taumafai mai ai lava e aotauina si a la fanau mo le aufaipese aemaise o viiga o le Atua, lea ua tulai mai o se tasi o aufaipese lauiloa i lenei talutalu fou le Unasa Brothers, e ui la ina ua tuu atu uma le faatuatuaga i alo ma fanau a le ekalesia mo viiga ma pesega a le ekalesia, a o le pulega foi a Melepone, ae e lē mafai lava ona mavae le aapa pea o le faafeagaiga i lana kitara ma felagiai viiga e momoli ai le faamanū i lona Atua i le tele o taimi, e pei o i lea na toe faaosofia ai le finagalo e toe tuufaatasia se CD auā le faafogafoga a le atunuu aemaise o se viiga ia maualuga o le Atua.
O le Aso Toonai la na tuanai atu na matuā faatumulia ai le Epping Memorial Hall i le maave eseese o le atunuu, le mamalu i le aufaigaluega paia mai lea tovine ma lea fatafaitaulaga, a o le paia ma le mamalu o Samoa na potopoto, ae tainane le maave eseese o uo ma paaga a le ekalesia, na patipatia ma molimauina le tatala aloaiaina o le faamoemoe sa gapatia mai ai le faafeagaiga ma le mamalu o le ekalesia.
Na uigaese lenei faamoemoe ona sa lē faatapulaaina le ulufale, ae sa tuu lava i le finagalo foai o le mamalu o Samoa, poo le ā lava le foai na talia ma le loto faafetai.
Na leai se ofi o le malu ae na tofusia le mamalu ma le CD, ae lē gata i lea na tali le sua ma taumamafa Samoa uma na aofia potopoto, i le taumafataga matagofie a o faagasolo faafiafiaga faaleagaga a le autalavou, pesepesega a le aufaipese,
a o le mataina o faiga a le aoga Aso Sa, fai foi le sao o le Unasa Brothers, JJ Recording,
aemaise o le aao fesoasoani o leitio faasalalau uma sa auai, ae o le auga lava o aute o viiga sa lagiina e le faafeagaiga ma lana aufaipese i pese o loo i le CD.
Na maualuga naua le faamoemoe ona o le auai atu o le taitai aoao o le ekalesia faapotopotoga a le Atua AOG i le lalolagi atoa le susuga ia Onesemo Pulepule ma le faletua ia Puao e pei ona sa maualuga foi i ai faaaloaloga a le ekalesia.
E leai se vaega o le aso na pa‘ū i le faafetai a le ekalesia na avea ai le tofa a Namulauulu ma o latou fofoga taumomoli. Saunoa Fatialofa e talifuaitau, ae tatalo faaiu le susuga i le toeaina ia Faiumu Faletua‘i, ma taape ai le fuamanusina ma le viiga o le Atua silisiliese ua maualuga.
Viia le Atua.
