E toetoe leai se tagata Aukilani e lē o silafia le tulaga maualalo na oo i ai le Blues i lenei tausaga talu mai le taamilosaga lakapi o le Super 15. E ui lava sa faaletonu foi i nisi o taimi, ae sa mafai ona toe faafoia vave e ala i le toe finafinau pea e tauivi ina ia a‘e manuia faiva o lena tausaga. Peita ua ese ai a la le tausaga na se‘i mavae atu i le vaaia lea o le agai i tua o le Blues i se tulaga sa lē masani ai.
O le fesouaina ma le lē foliga lelei mai o le Blues i le tausaga talu ai, lea lava na oo ai lava ina ua faailoa le maualalo tele o le tulaga na ausia, ae o se taimi muamua foi lea ua faatoa oo ai le Blues i lea tulaga.
Na lei nofo lelei le Iuni Lakapi e sailiili poo fea e faapogai mai ai lea faaletonu. E tele taaloga i le tausaga talu ai na oo lava faaseā lautele i le pulega i le tuai ona saili se isi Faiaoga e faaeaina le Blues.
Na oo lava ina sailiili le va o alii taaalo ma le pulega poo le agavaa lava o le alii Faiaoga i lena taimi.
O le filifilia ai o Umaga i lenei tai e avea ma Faiaoga o le Blues, o se matuai faamanuiaga lava e lē gata o se tagata sa taalo ma faatino le taaloga, a o talaaga i lona soifuaga taalo mai lava i Ueligitone le Lamua sa faamautu lona aiga ma amata faafaileleina mai ai le taleni o le lakapi mo ia lava ia, faasolosolo ina ua avea ma faiaoga e oo mai i le taimi nei.
Ma a tatou auiliuli ona sailiili i le tulaga faaeaina o lenei tamalii i le tele o nisi o Kalapu sa galue ai Faafaiaoga ia Tana Umaga. Masalo o le tulai mai o Tana Umaga o lona vaitaimi na tele ina vaaia ai le tulaga Player-Coach e pei ona sa iai i Farani faapea foi Counties Manukau.
O lea foi faatoa mae‘a le U20 World Championship ma ua siamupini ai foi Niu Sila o loo ‘ai filifili ai foi ma Tana Umaga i le filifiliina o lenei ‘au, ae o lona sao i le tapenapenaga mo lea taamilosaga, e talitonu ua matuai talafeagai lelei le filifilia o lenei alii ia Tana Umaga e faiaogaina le Blues.
O se tasi o vaega e ese mai ai lenei alii o Tana Umaga ua tofia nei ma Faiaogaulu o le Blues, ona e seāseā e faalogo e lafi i ni faamatalaga se faaletonu e ono tulai mai i se taaloga.
E lē o se tagata foi e fiafia tele foi i ni faatalanoaga, ae pei e foliga mai e faamoemoe lava Tana Umaga o foliga vaaia lava o fua mai o au galuega e tautala ma leo tetele ia, nai lo le tele o le tautala ae faaletonutonu iuga o taaloga.
Se‘i tatou tapuaia le alo faiva o lenei alo o Samoa i lona valaauina. E faamoemoe o lona tulai mai o le a avea o se faaola ma se faaea toilalo i le Blues e pei ona puapuagatia ai mai tausaga ua mavae atu.
