Sa faataunuuina le faamoemoe masani o le aoaoina o le ‘anofale ma le momosi o le tatou Gagana ma le Aganuu Samoa i le Aso Toonai, 13 Iuni 2015, i lalo o le Polokalame a le Leo o Tagata Samoa Faatulafonoina i Logan ua faaigoaina o le Fue Felafoai (Samoan Cultural Program).
O se manulauti ua vaaia le tupu ma ola ma ua toatele Tupu ma Tamalii ma le Faleupolu ua faamanuiaina ai ma maua ai o latou Tusipasi i le gagana ma le anoa o lo tatou tofi o la ta aganuu mai le Atua.
Ma o lenei polokalame e faia i Aso Toonai muamua o masina, ae na faataunuuina i le Aso Toonai aso 13 ona sa tuatuagia le uluai Aso Toonai o lenei masina i tapenaga o le Fu‘a ma le faamanatuina o le Tutoatasi o si o tatou atunuu i Kuiniselani.
O loo taumafai le faatonu o le polokalame o le faiaoga foi lea le Fetalaiga ia Le‘autuli‘ilagi Va‘atausili Tuala Tamalelagi Le‘apai o le Polokalame e tusa ma lana anava tausi ma lana tofa manino, ina ia mafai ona ofi atu le aoaoina ma le tāua o le tatou gagana ma le aganuu i totonu o le tomatau o aoaoga a Ausetalia ina ia mafai ona momoli ma aoaoina lenei milamila poo lana tofa manino i totonu o aoaoga faaiunivesite, kolisi ma aoga tulagalua ina ia pasia ma aloaia mai ai tusipasi i lalo o levels nei mo nai o tatou tagata.
O le taimi nei o loo maua tusipasi o le toatele i lalo o tulaga o aoaoga faatagata lautele ma le silafia faatofamanino (Community Courses) ma o se fiafiaga sili mo i latou ua maua ai o latou tusipasi e matuā mananaia ma maofa ai i le tapenaina ma lona tāua e ese le ‘anoa ma aloaia lona sauniaina.
O le faamoemoe o isi le aoga i le taimi nei e lua vaega o le Vaega Muamua ma le Vaega Lua (Level 1 & Level 2).
O i latou sa faauuina i le tausaga ua tuanai atu 2014 o lea ua sauni e faauu i lalo o le Vaega Lua (Level 2) a o i latou e fou mai i le polokalame i lenei tausaga e faauuina i le Level 1 ma o se polokalame ua matuā mafana ma faamalieina ai le mamalu o le vasega ona o le maualuga lea e iai le matalalagaina o le gagana ma le aganuu Samoa i le polokalame a le Fue Fealafoai.
O loo ua iai foi nisi mai le Setete o Sini sa talosaga pe maua se avanoa e avatu ai se isi polokalame e faia ia latou i Sini ona e faitatala le matagi ma ua puaina i lena itu o le Konitineta Tasemane le tumatila o le Fue Felafoai ma lona faatinoina.
O se isi o faamanuiaga o lenei Aoga ona e leai se totogi se‘i vaganā se donation e fesoasoani i nisi o vaega mo le agai pea i luma o le polokalame a le Fue Felafoai. Ma o loo maua pea le avanoa mo nisi o tamalii ma failauga aemaise o alo ma fanau o loo fia aoaoina i lenei matalalaga auā le palelaeiina o si o tatou atunuu o loo nanau ma pele pea ia te i latou le maualuga o lo tatou tofi mai le Atua Pulepuletetele.
