E tele ma anoanoai pepa ma mataupu mo le soifua a‘oa‘oina ua faaulufaleina ma avanoa mo soo se tasi lava e fia faia a‘oa‘oga poo le ā lava le ituaiga matua o le soifua ua iai. O se saunoaga mautinoa lava lea a le susuga ia Ben Taufua, o se tasi foi o tamalii o le atunuu, o loo feagai nei ma le faatonutonuina ma le faalauiloaina o polokalame ma a‘oa‘oga a le Iunivesite a Massey i Niu Sila atoa (National Manager).
O ia aoaoga ma polokalame ua faatulaina e le Iunivesite, ua fuafua lava mo soo se tagata, ae ua faapitoa foi mo tagata Samoa ma le Pasefika.
O le soifua a‘oa‘oina e pei lava ona iai le talitonuga e leai se papuipui, a o le vanimonimo foi lona tuaoi.
O se isi foi talitonuga e faapea e lē toe maua se isi soifua a‘oa‘oina, o le taimi lava lenei e faatino ma faataunuuina ai.
O le tele lava ia o molimau ma tautinoga a nisi sa a‘oa‘oina ma i latou foi ua sauni atu e ulufale mo matata eseese i le lala i Albany Aukilani i le Iunivesite lava a Massey. Saunoa foi le susuga ia Ben Taufua, ma faailoa lona fiafia tele ona o le toatele o tamafanau a Samoa ma le Pasefika ua mafai ona faaulufale atu ma talia le tele o polokalame ma matata eseese mo le a‘oa‘oina atili auā lava le manuia o aiga mo le lumanai.
O le Aso Toonai na tea nei, sa faalauiloa ai faalauaitele i tagata lautele ia fuafuaga a le Iunivesite mo le isi tausaga, ma o se avanoa sa molimauina le toatele o i latou sa asiasi i ai ma manaomia faamatalaga i a‘oa‘oga eseese. Sa maua foi le avanoa e tuufaatasia ai tamafanau uma a le Pasefika, ma fetufaai ai ma talatalanoa faatasi, sosoo ai ma le taumafataga o le aoauli.
Sa molimauina foi nisi o tamā ma tina ua matutua le soifua peitai sa fiafia lava e faaauau pea le toe a‘oa‘oina i mataupu o loo manaomia i le soifua, ma e ono mafai ona galulue ai mo le lumanai.
O nisi o loo lelei le tulaga o galuega o loo iai nei, o loo lelei foi le tala o le seleni maua mo le aiga, peitai sa tautino lava i latou, o le avanoa a‘oa‘oina e lē toe maua. E lelei lava le sailiili pea, ma galulue manū o maua le malosi.
O se tasi o tina ua matua, le afioga ia Muaausa Tueipi, o le tina o le alii tautaua o le lakapi All Blacks, o Eroni ma le tamaitai lauiloa i le Silver Fern a Niu Sila Sheryl Clerk, o loo faapea foi ona fiafia e faataunuuina nisi o mataupu i matata eseese i totonu o Massey i le taimi nei.
