Mo le silia nei i le 10 tausaga, o loo feagai pea Samoa aemaise i nofoaga o le talafatai o Apia ma le faafitauli o le tele o taifau feoai solo. Ua uma foi taumafaiga na faalauiloa ma faatino e le Pulega o Tagata Tafafao mai Fafo ona o le tau tuuitiitia lava o le numeara o taifau e feoai solo i Apia.
Sa iai le vaitaimi na iai laau malosi na faaaogā ai. E lei umi foi lea taumafaiga ona na fana sese ai e se sui o le Pulega se taifau ae misi le taifau ae ta‘e ai le tioata o le Faletupe Tutotonu. Sa toe faasalalau foi ona ua amata ona lagalaga mai faitioga a tagata asiasi mai auā e toalua ua osofai e taifau.
E fai uma ia taumafaiga ae ua faagasolo galuega a le Faalapotopotoga lenei mo le puipuiga o meaola le Animal Protection Society (APS) i afioaga eseese o le atunuu ina ia taumafai ai e fofo taifau ma faaitiitia ai le soona fanafanau o taifau ma tulai mai ai le mau faafitauli i totonu foi o afioaga latou.
O se vaega la o tagata fesoasoani mai i fafo, ia ua galulue i lenei masina ma le APS i le toe unaia o taotoga nei o meaola ma ua amata lava i le talafatai o le taulaga e pei ona faatautaia ai i tua ane o le Maota o le Malo i le Eleele Fou lea galuega tele i le vaiaso na tea nei.
O le galuega o le tau tapue mai o meaola nei ua tele ina tataa solo i le taulaga, o le galuega aupito sili ona faigata auā o le eseesega ma taifau o loo avatu lava e aiga latou o loo iai tagata e lalata ai, ae o le galuega na vaaia i le vaiaso na tea nei, a lē vave ona tui faagase le taifau, na o le osofai ai o tagata nei o loo ofo mai lo latou taimi e faatino ai lenei galuega mo meaola nei.
E ui i lea na tele lava taifau na maua ma vave loa ona togafitia ina ia mafai ai ona tuuitiitia le soona faaopoopo o le numera o taifau e vaaia i le taulaga. O le tele lava o ia meaola o loo nonofo i aiga i le taulaga ae ua agai solo mo le sailiga o meaai ma tumutumu solo i autafa o kalone lapisi.
E tumutumu ane foi i le mamalu o le atunuu e mālōlō solo i lalo o laau auā taumafataga ma e faigata tele ona tutuli ese auā e lē iloa poo fea e agai mai ai ia meaola.
O lea la ua iai se fuafuaga a le APS o le a agai mai pea e mataitu lelei le tulaga o iai nei meaola ma taumafai e saili aiga e ana auā e tele lava ina agai mai i maota o loo i le taulaga nei meaola.
O Leulumoega lea na agai i ai fomai manu ma i latou e fesoasoani i le faaiuga o le vaiaso ma o le tele lava o taimi o aulotu o loo talimalo i nei fomai auā le faatinoga o a latou galuega.
O Vaoala lea ua faamautu ai le Ofisa o le APS ma ua latou ta‘ua ua tele lava foi le suiga ua iai tagata i lenei vaitau, ua agai atu lava pe a tulai mai ni faafitauli e faatatau ia latou taifau.
Peitai ane o le faafitauli tele lava lea o loo tulai mai, o le tele o aiga e lē o iai lava se manatu e avatu meaola nei mo togafitiga auā e ono faatupu ma‘i foi i fanau laiti pe a lē mamā ona vaai lelei nei meaola.
