E toatele nisi o tamafanau a Samoa, o loo faaaogāina le polokalame a le Polyethnic i Otara, Aukilani i Saute i le a‘oa‘oina o le gagana Peretania Level Three.
O le tau o lenei polokalame, o le faalauteleina lea o le silafia ma le malamalama i lea foi gagana ma lona faaaogāina, aemaise lava o le agavaa faafaiaoga mo le a‘oa‘oina o le fanau i Samoa ma Niu Sila.
O itu tāua o le polokalame lea, ona muamua, e lē gata i le toe a‘oa‘oina o le Igilisi Level Three, ae o le mafai foi ona sitepu i le isi laasaga mo le a‘oa‘oina o le tipiloma i le tulaga tau pisinisi ma tiute uma tau ofisa (Diploma in Business & Administration).
O le a mafai foi ona maua ai le avanoa e talosagaina le pemita poo le visa faigaluega faatasi ma le visa aoga.
O le visa faigaluega, o le a mafai ai ona faigaluega mo le 20 itula i Niu Sila, a o faaauau ai pea le aoga i totonu lava o Niu Sila.
A maua le pemita faigaluega, ona sosoo ai lea ma le avanoa e talosaga tuusa‘o ai le pemita nofomau a o faia pea le aoga.
O le faatulagaina o loo mulimulitai pea i le manaoga o le Matagaluega o Femalagaiga a Niu Sila, ae fua lava pe a ogatasi ma le manaoga o le tama poo le teine aoga, peitai o se avanoa e tuu pea i le faitalia o le tagata, pe toe foi i Samoa e faaaogā ai le tomai, poo le saili galuega i Niu Sila pe afai ae talia le talosaga nofomau, poo le faaaogā o le pemita faigaluega
Sa talanoa i nisi o tama ma teine o loo aooga ai i le taimi nei i Otara, o i latou uma e mai Samoa, ma sa malaga faapitoa mai i lalo o lea lava polokalame, e aofia ai ma tamaiti e toalua na filifilia mai e le malo o Samoa, e faaaogā i ai avanoa sikolasipi sa ofoina e le Polyethnic i Otara lava.
1. Flo Ualesi, 21 tausaga o Fagalii (sikolasipi a le malo o Samoa)
Faculty of Education Certificate in Art NUS Samoa 2009
Bachelor of Education – Primary School 2010
O a‘u sa filifilia mai e le pulega poo le Board a le NUS mai Samoa, mo le avanoa sikolasipi i le Polyethnic, i le toe a‘oa‘oina o le gagana Peretania Level Three.
Ua ou fiafia tele ina ua ou sau i Aukilani ma faaauau ai lo‘u iloa i le gagana o loo fesootai ai le lalolagi atoa. Sa tau faaletonu lo‘u mafaufau ae ou te lei tuua Samoa, ina ua faailoa mai o le a‘oa‘oina o le Igilisi lea ou te sau ai. Sa ou manatu pe aisea o le a toe a‘oa‘o ai le gagana Peretania, peitai o loo o‘u malamalama ma o loo mafai foi ona ou faaaogāina e tautala ai.
Peitai sa faamalosi mai lo‘u aiga ou te sau, faatasi ai ma le pulega o le Iunivesite a Samoa. Ua ou taunuu mai ma ou iloa ai toetiti lava a ou misia lenei avanoa tāua tele. E tele ma anoanoai nisi o mea fou ma le faaopoopoina o lo‘u iloa ma le malamalama i le Igilisi faato‘ā ou maua i Niu Sila. O le tulaga lelei tele mo a‘u ma lo‘u galue ai o se faiaoga, pe a ou toe taliu i Samoa. E moni lava i le Iunivesite a Samoa, ae pei lava le aoga i Niu Sila, e sili atu lona malosi i le va ma isi atunuu i fafo.
E lē gata i le tāua mo a‘u ma le galuega faafaiaoga, ae o le a mafai foi ona tufa atu lea lava malamalama ma lea faamanuiaga mo tamaiti Samoa auā lo latou ola a‘oa‘oina.
Ou te faafetai lava ia Lemoe ma lenei aoga ma le polokalame ua tele ai se iloa. Faafetai foi i le malo o Samoa, ona o le filifilia o a‘u mo lenei avanoa tāua. E sa‘o lava le faamalosi mai a lo‘u aiga ou te sau. O le a lē galo lenei faamanuiaga mo a‘u ma lo‘u olaga.
2. Mozait Lene Milo, 20 tausaga o Siusega, Manono, Satupaitea (sikolasipi a le malo o Samoa)
Computer, Science, Sports NUS Samoa
O a‘u o le faifeau lo‘u tamā, ma sa matuā leai lava so‘u manatu ou te sau ina ua faailoa mai ia te au le avanoa lenei. Sa filifilia a‘u e le Board a le NUS ma te toalua mai ma le tamaitai o Flo.
O le upu a lo‘u tamā, e leai se isi o matou e alu ese ma Samoa e nonofo lava i Samoa ma aooga ai ma faigaluega ai foi. Sa umi foi se taimi o tau faamalie lo‘u tamā, pe mafai ona ou sau e faataunuu le valaau lenei e aoga ai i Niu Sila.
Peitai na iu lava ina malie lo‘u tamā, o lea la ua ou sau ma ou vaai ma ou iloa, le matagofie ma le tāua o le avanoa na semanu a misia.
E matuā tāua tele mo a‘u ma matou uma lava na malaga mai i lenei polokalame.
Faafetai foi ia Lemoe ma le aoga, auā matou te lē masani, ae ona o lona naunau ina ia maua e tama ma teine Samoa lenei manuia, lea ua matou faapenei ai, ma avea matou e pei o se aiga e tasi i le mafutaga i totonu o le aoga.
O le matuā tāua lava o le aoga mo a‘u, o lea foi ua maua mai le tala ua faamanuiaina a‘u i le se‘i foi lea o le faigauo a Samoa ma Niu Sila.
O le a filifili la pe a uma loa le aoga faigaluega loa i Niu Sila, pe toe foi i Samoa.
Ae ou te iloa e malo lava lo‘u toe foi i le atunuu, ou te auauna ai ma tautua ai. Ua pasi uma a‘u suega sa faia, ma ua ou faatali nei ou te alu motu mo le sailia o le tipiloma pe a talia e le malo o Samoa, ou te nofo e faaauau le sueina o le tipiloma.
Faafetai lava mo le Polyethnic ma avanoa ma le malo foi o Samoa, ona o le filifilia ai o a‘u ou te sau e faaaogā le avanoa.
