Ua matalupe le seuga, auā ua liligo le fogatia ma ua pau foi le tua‘au mafuamalu ae popogi vanu. Ina ua usiusi-a-vaa-savili le malu fogapapa o le paia o Aiga. Lea ua papae ulupaga ae moefilia mauga o Salafai. Ua faana‘e lupe le la, ua sua fuefue le tai auā ua mapu le Ta‘atuimalae.
Ua talanai le utouto o tutaga a le Vaaloa, ua mapu i le sasaga le utuga-vai nai Ma‘auga ma Nu‘uausala. Auā o lea ua ifo i Fogatia-fili-malae lupe papagata sa i le tuasivi. Ua lē o se taeao la na faataitai-no-no, ae o le manu-a-fulu ua vilivili afu-afu.
O le Aso Lua o le vaiaso na se‘i mavae atu nei, na faatasi atu ai lana Afioga i le Palemia o Samoa, Hon. Susuga Tuilaepa Dr. Sailele Lupesoliai Aiono Naioti Fatialofa Malielegaoi i se sauniga i le pitonuu o Otahuhu i Aukilani i Saute, e tatala aloaia ai le ofisa ma le lala lona lua o le kamupani faatau taavale o le G-MANA WHOLESALE AUTO’s LTD.
O le kamupani e pulea ma faatautaia e se tasi o tamafanau a Samoa, lana afioga i le Aloalii ia Galumalemana Tai Galumalemana mai le afioaga o Vailele i Samoa.
O paia faasino auā Saleupolu, lo la toalua o Lefau ma Tupuana‘i, ae tainane le Tuanofoa ma le Igaga o le fale, faapea le Falefia o Alii, le afio i le Ma‘upu o Savai‘inaea, faapea foi le Faiga ma Pulemanafa, mamalu ia Tui Samau.
O le sauniga faapitoa lenei sa faatasi ai le faletua o le Afioga i le Palemia faapea lana Afioga i le Fofoga Fetalai o le Maota Fono o le Palemene o Samoa, le Susuga ia Hon. La‘aulialemalietoa Asiata Leuatea Polotaivao Fosi Schmidt, faapea le afioga ia Fonoti Dr. Lafitai Iupati Fuata‘i, o le Komesina o fefaatauaiga o oloa a Samoa i Niu Sila.
O le afioga ia Peseta-Tamalelagi Savea Leulua‘iali‘i Al Harrington Lavea sa tutootoo e fai ma fofoga o le aso e faafeiloai malo ma le valaaulia.
Sa amata i le sauniga lotu i fafo o le maota na taitai e le Afioga ia Patele Andrew Atonio. Sa ootiina e le afioga i le Palemia le lipine ma tatala le faitotoa o le maota ma agai loa i totonu.
O le afioga ia Toleafoa Joe Galumalemana ma le aumaga sa feagai ma le ‘ava o le feiloaiga ma aami ipu o le taeao.
Sa sosoo ai ma le saunoaga aami autu o le aso i lana afioga i le Alii Palemia o le Malo tutoatasi o Samoa. I le saunoaga a le Tamā o le atunuu na ia faatāuaina ai le sao o alo ma tamafanau a Samoa i atunuu i fafo ma a latou pisinisi ma atinae o loo tautua ai Samoa.
Sa ia faafetaia foi le alii pule ia Galumalemana Tai Galumalemana ona o le sogasogā ma le tauivi i atinae lelei, auā e lē faigofie ona o le tele o le alofa i o tatou tagata. Peitai o tatou tagata lava ma aiga e mafua ai ona gau se pisinisi. O le tele o le aitalafu ae lē totogiina.
“Sa toatele le aufaitio i le taimi na sui ai tulafono o auala a Samoa, ae sa silasila mamao le Malo i se lumanai o Samoa, ma se auala e faafaigofie ai ma taugofie le aveina atu o taavale mai Niu Sila.
Ua leai se tasi o toe faitio, ua matuai aogā tele le auaunaga ua faatino e le G-MANA mo tatou tagata i Niu Sila nei ae faapena foi lo tatou atunuu i Samoa ma lona tamaoaiga,” o le saunoaga lea a le afioga i le Palemia.
Sa tali faitau le afioga i le alii pule ia Galumalemana Tai Galumalemana i le saunoaga a le Palemia ma faafetaia ai le taimi tāua ua malaga mamao mai ai ma lona faletua faapea le afioga i le Fofoga Fetalai ina ia faatasi mai i le faatalauula atu.
Saunoa Galumalemana, “O ai a‘u le tagata faatauvaa ua e manatu mai ai? O le G-MANA ma lana auaunaga e faapei o se aiga. O nai a‘u paaga faapisinisi ma nai o‘u uso i totonu o le kamupani e faavae i le faaaloalo ma le faamaoni.
“Ia faia foi le mea sili e mafai ona fesoasoani atu ai i o tatou tagata Samoa ma soo se tasi. Sa aoaoina a‘u e o‘u mātua ina ia alofa, faaaloalo ma ia faamaoni.
E tele taimi ou te lu‘itauina ai a‘u paaga i Faletupe ina ia fesoasoani mai e faafaigofie ai ona maua taavale taugofie e gafataulimaina e o tatou tagata ona totogi.
“O se lagona ootia e oo mai ia te au pe afai e faamalieina se tasi i le matou auaunaga. Ou te moe miti pea ia umi ni tausaga e faatino ai lenei tautua ma iai se aso e faatuina ai se lala o lenei kamupani i Samoa,” o le saunoaga lea a Galumalemana.
Sa taualuga lea aso matagofie i se taumafataga tele ma faafiafiaga a ausiva lauiloa o le Tatau Samoa ma le La O Samoa.
Sa faatasi mai le vasega o tusitala ma le aufaasalalau o leitio ma niusipepa a Samoa ma le Pasefika, faapea foi le faletelevise o le TVNZ ma faatalanoaina le afioga i le Palemia ma le afioga i le alii pule ia Galumalemana.
O upu tomuli na saunoa i ai le fofoga o le aso le afioga ia Peseta-Tamalelagi Savea e toe faafetaia ai le Tamā o le atunuu ma lona faletua, faapea le Fofoga Fetalai o le Palemene o Samoa, le Aufaigaluega Paia a le Atua, ma le Komesina o Fefaatauaiga a Samoa i Niu Sila nei le afioga ia Fonoti Dr. Lafitai Iupati Fuata‘i aemaise le mamalu o le valaaulia ma Samoa sa potopoto, ona ta‘ape ai lea o le fuamanusina ma tala le filialii.
E momoli atu ai foi ma moomooga lelei ma faamanuiaga a le Samoa Times i le auaunaga a le G-MANA WHOLESALE AUTO’s Ltd.
