Sa faasolo i ekalesia o le Perepereane le faigamalaga faatala‘i a ni isi o tupulaga talavou mai isi atunuu o le lalolagi e pei o Kilipati, Malawi, Botswana, Zambia, Papua Niu Kini, Bangladesh, Guyana, Jamaica, Initia, Korea i Saute ma Samoa. E toatasi si tama talavou mai Samoa mai le nuu o Lalomanu o Filipo Aleki o loo auai i lenei malaga faamisiona taamilo.
O le Aso Tofi e tau lava i le Aso Sa na tea nei na mafuta ai le aumalaga ma vaega eseese o le ekalesia PIPC i Porirua, ma sa taitaia e le susuga i le tamaitai faifeau o Sharon Ensor lenei malaga taamilo ma o ia o se faifeau mai Ueligitone.
E tusa e 10 masina o lenei malaga taamilo i le lalolagi ma e 5 masina na iai i Taiwan, 2 masina i Kilipati ma le 3 masina lenei ua taamilo ai i Aotearoa, ma o loo tali e ekalesia eseese o le Perepereane i Aotearoa.
Na faaalia le fiafia o le aumalaga ina ua mafuta mai i le po o le fiafia faaiu o le tausaga na faatino ai le tausala a le Itupa Samoa o le ekalesia i le Aso Faraile. O nei foi aga faa-Samoa sa matauina e le aumalaga talavou ma na latou faaalia le sisiva fiafia i taimi o siva a matafale eseese.
E uigaese foi le matagofie o a latou faafiafiaga faa-Samoa, faa-Kilipati sa faaalia i lea po o le tausala, ma ua latou iloa foi ona lafo tupe i le ipu e pei lava ona mātau i lea po le faatinoga o le tausala poo sailiga tupe a tagata Samoa.
Na matuā faatumuina le sauniga lotu i le Sapati, ona sa taitaia le sauniga lotu e le tupulaga talavou o le ekalesia faapea ma isi autalavou o vaega o Itupa e tolu: Samoa, Atu Kuki ma Tokelau o le ekalesia ma sa faapea foi ona tapuai faatasi ai ma le aumalaga faamisiona, ma sa usuina ai foi a latou pese faaatunuu ma faaperetania i le sauniga.
O le mae‘a o le sauniga na tuumuli atu ai malo mo le toonai i le maota o le ekalesia PIC House mo se taumafataga matagofie felanulanuai na saunia lava e aiga o le tupulaga talavou a le ekalesia.
O le mae‘a ai o le toonai na faamavae atu ai loa le susuga ia Perema Leasi ma le tupulaga i le faigamalaga, ma faamanuia i ai e pei lava ona masani ai pe a fou e toe foi se aumalaga.
Na faapea foi ona momoli i ai ma alofaaga o le Kirisimasi ma le Tausaga fou.
