E to‘a 23 A‘oa‘o ua faauu mai le Kolisi faafaifeau i Malua ua iu manuia le fā tausaga sa aoaoina ai i le galuega faafaifeau mo le tautua tala‘i a le ekalesia Faapotopotoga Kerisiano Samoa le EFKS.
O le molimau a nisi o i latou ua faaiuina le taumafai, e lē faigofie le fā tausaga sa aoaoina ai.
E lē gata ina faigata le feagai mai mataupu a o le faigata foi o le olaga faaa‘oa‘o aemaise i le tausaga muamua ua faatoa ulufale i le kolisi faafaifeau.
O aiga foi sa tapuaia le feagai ai ma aoaoga sa lē tuua le lagolago atu i fanau a o feagai ma aoaoga e le gata i le itu tau tupe a o isi vaega sa manaomia ai le latou fesoasoani. Faaalia e se tasi o faiaoga o le kolisi faafaifeau, o le olaga lava lea i Malua peitai ua ese nei aso mai aso ua mavae.
O alo ma fanau ua mae‘a le taumafai o lupe faalele a nuu ma ekalesia aemaise o aiga, auā ua sauni nei e feagai ma le tausiga o ni aulotu o le a valaauina ai i latou.
O faiga masani a le EFKS e valaauina nisi ua iu e galulue i ni aulotu pe a mananao i ai se aulotu, ae o nisi e filifilia e galulue mo le ekalesia mo ni tausaga.
O nisi foi e toe faaauauina le olaga aoaoina i nisi aoga maualuluga faafaifeau poo iunivesite e finagalo le ekalesia e faaauau i ai. O nisi foi ua mae‘a aoaoga ua galulue i le kolisi faafaifeau i Malua o ni faiaoga, ma faatalitali ai ni valaau mai ni aulotu. O le molimau a le tusitala i le faauuga o lenei tausaga, e maoa‘e nisi o matati‘a na ausia e susuga i A‘oa‘o i le itu i le ola aoaoina ona ua maua e nisi faailoga maualuluga i le mataupu silisili ma suesuega i le Tusi Paia.
Na leai se ofi o le maota fono o le ekalesia i Malua i le Aso Toonai na tea nei i le toatele o aiga aemaise o mātua, faapea uo ma aumea mamae sa auai e fia molimauina le faauuga a le kolisi faafaifeau o lenei tausaga.
O le susuga i le toeaina faatonu Peleti Toailoa sa saunia le lauga o le faauuga ma o se feau matagofie na tapena i ai le susuga i le toeaina auā le faatotogaina o loto ma agaga o susuga i A‘oa‘o ma o latou faletua ua mae‘a le fā tausaga i le upu o le ola a o lei sagai atu e feagai ma ni aulotu o le a valaauina ai.
Ia manuia tele le faauuga ma ia sao ma uli le faamoemoe auā le ola faaleagaga o tagata aemaise o le galuega tala‘i o le talalelei.
