“E leai lava se isi fofo o faafitauli nei e pei o le sauaina o tina ma tamaitai ma fanau, o le tootutuli ma faasifo Samoa i le Atua”…Kasiano Leaupepe
O susuga i faafeagaiga ma o latou faletua mai nisi o ekalesia i le lio o le taulaga sa mafuli iai le aofia na auai i le faatalanoaina o le lipoti i le sauaina o tina ma tamaitai faapea fanau i Samoa. O susuga foi i faafeagaiga na auai na tele ina sii aao ma faaali o latou finagalo i le lipoti aemaise o folasaga mai le Komesina o Sulufaiga, o le taitaifono o le fono a ekalesia soofaatasi, o se tamaitai ose faletua ose faifeau ua umia le faailoga fomai, o le Pule sili o le Matagaluega o Tina ma Tamaitai, ma le faamasino o le faamasinoga faaitumalo.
O le lipoti i le sauaina o tina ma tamaitai faapea fanau i Samoa o loo iai fautuaga ma faitioga i le pogai o le tulai mai o sauaga. O ekalesia o loo mamafa iai se finagalo o le lipoti i le faapea mai e lē o lava le faatinoina o lo latou tiute o le faufautua ma apoapoai ma saili ni fofo o sauaga.
O le faatalanoaga na taloina e le Komesina o Sulufaiga i lona tulaga o le faauluuluga o le ofisa o aiātatau a tagata i Samoa na avanoa ai nisi o faifeau e faaleo o latou finagalo.
Na faaalia e le susuga Vaiao Eteuati o se faifeau o le ekalesia Metotisi i Samoa ua penisione ma malolo manumalo, ua olopala faifeau ma ekalesia i tuua’iga ae nate ioe foi e iai faaletonu i tiute o faifeau.
O le susuga Samoa Unoi o le ekalesia Peace Chapel ma le taitaifono o le fono a ekalesia soofaatasi, e manatu i laua e tasi le fofo o le tutupu pea o sauaga ma aafia ai le saogalemu o le ola o tina ma tamaitai o le anapogi ma faatoese i le Atua.
Na saunoa Samoa Unoi a toe foi le atunuu i aoaoga a le Tusi Paia o i e maua ai le tali ma taofia ai sauaga.
Na faaalia e le susuga Moli Moli o se faifeau EFKS, o lana matau o le mataupu ua faatulai mai e lē o paleni i lona manatu ua faapito le Malo i le faatu na o le matagaluega mo tina ma tamaitai ma soalaupule ai polokalame uma ma faafitauli o loo aafia ai le soifua lelei o lea itupa, ae ua leai se matagaluega mo ni auaunaga e atinae ai le ola ma le soifua o le itupa o tama poo tama tane.
E manatu le faifeau pe ana iai se auaunaga faapea a le Malo o le a mafai ai ona faamaopopo ni a’oa’oga mo tama tane uma o le atunuu ma maua ai ma le fofo o sauaga. O le finagalo o le Komesina o sulufaiga o le galulue faatasi o auaunaga e pei o Leoleo, le faamasinoga, pule mamalu a alii ma faipule, ma matagaluega o feagai ma atinae o tina ma tamaitai e maua ai le tali ma taofia ai sauaga faasaga i tamaitai ma fanau.
Na faaalia e se tasi o faafeagaiga ua lē maua lona suafa ma lana ekalesia, e faigofie ona maua le fofo pe a galulue faatasi ekalesia uma i le atunuu.
