O le amataga o le vaiaso nei na faia ai se faasalalauga faalaua’itele faapitoa mai le taitai o le atunuu le Afioga i le Alii Palemia, susuga Tuilaepa Sailele Malielegaoi, e faatatau lea i le tapunia uma ai o galuega a le Malo i le Aso Tofi ma le Aso Faraile o le vaiaso lenei ona o aafiaga o le atunuu i le pepesi ai o le siama lenei o le misela lea ua faamauina le silia ma le 50 o i latou ua maliliu ai.
O lea saunoaga mai le Alii Palemia na ia taua ai, o le tapunia uma ai o galuega a le Malo ina ia mafai ona faatino uma ai le faia o tuipuipui o le misela mo i latou e oo mai i le taimi lenei e lei faataunuuina lava o latou tuipuipui.
Saunoa le taitai o le atunuu, o le Aso Tofi ma le Aso Faraile nei o le a faaaogā ai e le Malo e faatino uma ai nei tuipuipui aua o le a maua uma le toatele o tagata o aiga taitasi i totonu o aiga ona ua leai ni galuega.
Faatasi ai ma le toatele o tagata faigaluega a le Malo o loo galulue faatasi ai i le faia o nei tuipuipui e pei ona tuufaatasi ai sui o le Matagaluega o Tina ma Tamaitai, Atina’e o Nuu, Alalafaga ma Agafesootai, o le Matagaluega o Leoleo faatasi ai ma le galuega a le Matagaluega o le Soifua Maloloina. E pei ona silafia o le amataga foi o le vaiaso na faalauiloa mai ai e le komiti mo faalavelave matautia i totonu o le atunuu le maua ai o le avanoa mo tagata lautele seia oo atu i le 60 tausaga le matutua ina ia faia ai o latou tuipuipui o le misela.
Na faapupula foi e le Alii Palemia i lana saunoaga, e moni e tapunia galuega uma a le Malo, ae e faaauau pea nisi o auaunaga manaomia e pei o le Pulega o le Suavai ma le Malosiaga tau Eletise faatasi ai ma i latou o galulue pea i le faia ai o tuipuipui o le misela. O se tasi lenei o tala fiafia mo le toatele o tagata faigaluega a le Malo ona ua leva ona mananao ai ina ia taofia loa galuega ona o le misela peitai e lē o se tala fiafia mo tagata faigaluega i pisinisi ma kamupani tumaoti ona e foliga mai e faaauau pea a latou galuega i le Aso Tofi ma le Aso Faraile.
O le lauga faapitoa lenei a le taitai o le atunuuu na ia momoli ai foi ma faamaiseiga a le Malo i aiga ma mātua o fanau ua aafia ma maliliu ona o le siama o le misela. Na faamalosiau foi le taitai o le atunuu i le pitolaau a mātua aemaise o sui o le malo i totonu o Nuu ma Afioaga taitasi ina ia galulue faatasi e lagolago le galuega o faia nei, i le faataunuuina lea o tuipuipui o le misela.
Na faamamafa e le Alii Palemia i le atunuu, ina ia aua le nofonofoa’i ae ia faatino le faia o galuega a tagata uma ina ia vaai lelei le fanau ma tausi lelei le fanau. Na matuā samala foi e le Alii Palemia le tele o mātua o loo ave a latou fanau i fofo Samoa poo Taulasea aemaise foi le Kangen Water lea sa spray ai le toatele o fanau, ona e leai ma se fofo Samoa poo le Kangen Water e mafai ona tapē ai le siama lenei o le misela.
O le vaiaso lenei ua faamoemoe le Alii Palemia ma nisi o vaega o le kapeneta e Malaga asiasi atu ai i le motu tele i Savaii ina ia asia nisi o nofoaga poo Falema’i faaitumalo o faataotolia ai i latou o aafia ai i le misela.
O le tatalo a le taitai o le atunuu, Ia ia i pea le faamālōlōga a le Atua i luga o Samoa a’o iai i mafatiaga ona o le gasegase lenei o le misela.
