Ua a’e manuia le faatamasoalii a le tamaitai lalelei o Fonoifafo Nancy McFarland Seumanu e pei ona alo atu i le tauvaga ma manumalo ai i le sailia o se tamaitai lalelei o Atumotu o le Pasefika poo le Miss Pacific Islands mo lenei tausaga 2019 seia oo ina atoa le tausaga o lana nofoaiga i se taimi o le tausaga fou 2020.
O le po o le Aso Toonai talu ai, 30 Novema, na faataunuu ai lenei tauvaga i Papua Niu Kini, ma e to’a 12 tamaitai lalelei mai atunuu eseese o le Pasefika sa tauva ai i lenei tauvaga.
Sa tauva le Miss Marshall Island, Miss American Samoa, Miss Cook Island, Miss Fiji, Miss Tahiti, Miss Tuvalu, Miss Nauru, Miss Tonga, Miss Papua New Guinea, Miss Solomon Island, Miss Wallis and Futuna, ma le Miss Samoa.
Na tau fai mata’alia uma tamaitai na tauva, ma e lei iai se isi na faatemutemu i le faatinoga o ana tapenaga i vaega taitasi sa tauva iai, peitai e pei lava o upu a le atunuu, “E lē mua uma ni vaa”, e ui lava i le mataina o tamaitai taitasi, ae sa manino mai lava le matilatila o le faatinoga matagofie a le tamaitai tausala o Samoa, aemaise lava ina ua faatino ana tapenaga mo vaega taualoa o le tauvaga, e pei o lona laei faaleaganuu lea na manumalo ai, ma lana faatalanoaga poo le interview, lea foi na matuā faigofie lava ona mautinoa ai le matuā lava tapena o Fono i nei vaega uma o le tauvaga.
E pei ona silafia, e maeu foi le faamanuiaina o lenei alo talavou o le atunuu, auā na amata ao atu lava le kemu a Fono i Niu Sila, i le tauvaga o le Miss Samoa NZ, lea na manumalo ai Fono i le pale muamua lea.
Ona malaga ai lea i Samoa e toe tauva ma isi uma tamaitai sa avea ma Miss Samoa mai atunuu o loo alala ai, e pei o tamaitai mai setete eseese o Ausetalia, aemaise foi nisi tamaitai sa tauva mai lava i Samoa.
Peitai o inā foi na toe faapaleina ai i lona pale lona lua, o le Miss Samoa, ua fai ai o ia ma sui o Samoa aoao e finauina le pale o le Pasefika. Ma o le pale lona tolu lena o Fono na toe faaee, ua ia tauaveina ai le tofiga e fai ma sui o tamaitai talavou uma lava o atunuu uma o le Pasefika, e faalauiloaina le Pasefika atoa i isi atunuu o le lalolagi, ma taulamua i soo se polokalame tāua mo se lelei o tagata o le Pasefika.
O Fonoifafo ua lona lua ai nei ia te ia tamaitai ua mafai ona ausia lenei tulaga maualuga o le aofai uma o pale e tolu e amata mai lava i le Miss Samoa NZ; Miss Samoa; ma le Miss Pacific Islands, e pei ona uluai tulai mai ai le tamaitai ia Latafale Auvaa.
O se matati’a mataina lenei mo lenei foi alo tamaitai o le atunuu, o se ausiaga sa ta’ua lava e le tamaitai o Fono i nisi o faatalanoaga ma ia i taimi ua mavae ina ua amata ona manumalo i nei tauvaga, o se mea sa mamao ma lona mafaufau e fia oo iai a’o laititi, peitai a’o faasolo lona matua, na iai nisi mea na faifai mālie ai ona amata lilifa loa lona mafaufau, e manaia foi pe a faataitai atonu foi e maua ai nisi lesona aogā mo lona olaga talavou.
O Fonoifafo, o se tamaitai tausi soifua faauuina i Niu Sila, o lana galuega tumau lea a’o lei ulufale i nei tauvaga mo tamaitai talavou. I le taimi nei, talu mai ona avea ma Miss Samoa, ua faataatia ese ai lana galuega tumau mo sina taimi a’o alo atu e faataunuu ona tofiga, lea ua toe faalautele atili mai ina ua ia pale foi i le Tausala o le Pasefika.
Ma o tomai faatausi soifua o lenei tamaitai talavou, na manino mai lona naunau pea e faatino ai sana auaunaga a’o iai i Samoa mo ona tiute o se Miss Samoa, ma sa manino foi le telē o lona silafia i lana galuega o se tausi soifua, ina ua tali i lana fesili o le interview ma matuā laulau taitasi ai e Fono aafiaga o le soifua maloloina o tagata uma, pe a lē lelei ona malupuipuia o tatou siosiomaga.
O le iuga o le tauvaga mo se sailia o se Miss Pacific Islands o loo faatulaga atu i lalo.
Miss Internet – Miss Marshall Island
Miss Personality – Miss Tonga
Miss Photogenic – Miss Marshall Island
Miss Tourism Award – Miss American Samoa
Best Traditional Wear – Miss Samoa
Best Sarong – Miss Papua New Guinea
Best Talent – Miss Solomon Islands
Best Interview – Miss Samoa
4th Runner up – Miss Tonga
3rd Runner up – Miss Tahiti
2nd Runner up – Miss Papua New Guinea
1st Runner up – Miss Solomon Islands
Miss Pacific Islands 2019 – Miss SAMOA!!
Faamalo atu Fono i lou tulai mai, ma tau ina ia manuia le faatinoga o ou tiute o se Tausala o le Pasefika e lē gata mo lou atunuu o Samoa, ae faapea i atunuu uma o le Pasefika ua e tauaveina o latou igoa.
