Tuiga o le misela sa faia i le Aso Sa

E lē o toe nofonofoa’i le Matagaluega o le Soifua Maloloina ma le Komiti o Faalavelave Faafuasei i le atunuu i le faamalosia lea ona faia o tuipuipui o le Misela i le atunuu.
Ua molimauina i le vaiaso ua tuanai le aga’i sa’o o sui o le Soifua Maloloina faatasi ai ma leoleo ina ia faia tuipuipui o le Misela i soo se aiga i totonu o le atunuu.
O le vaiaso foi lenei ua faaopoopo atu ai ma le fesoasoani a le Matagaluega o Tina ma Tamaita’i, Atina’e o Nuu ma Agafesoota’i e ala lea i le malaga atu ai i tua i Nuu ma Afioaga ina ia mautinoa le faia uma o tuipuipui o fanau mai le 19 tausaga aga’i i lalo.
Na molimauina foi le leai o se malologa mo sui o le komiti o faalavelave faafuasei aemaise o le soifua maloloina i le Aso Sa na tea nei ina ua asia ai nisi o aiga e tau mamao mai i aai e ala i le faamalosia ona faia o tuipuipui o le misela. Ua oo lava foi i faasalalauga i luga o leitio, nusipepa ma faletelevise i le atunuu le una’i malosi a le Malo ina ia vave ona faatino le faia o tui nei o le Misela.
O se tasi o polokalame a le Matagaluega o le Soifua Maloloina na faatautaia ai i luga o le TV1 Samoa i le faaiuga o le vaiaso na tea nei, na saunoa manino ai le alii foma’i ia Salausa Dr John Ah Ching, e tāua tele le faia o tuipuipui nei o le misela ina ia mafai ona tetee atu i le siama o le Misela pe a oo i le taimi e aafia ai, ae afai ae maua ane le fanau i le siama o le misela ae e lei faia ni tuipuipui o le misela, e faigata tele la ona tau togafiti ma tineia lea siama.
Na fautuaina malosi foi e le alii fomai ia Salausa, o ia foi o le Minisita Lagolago o le Matagaluega o Tina ma Tamaitai, Atina’e o Nuu ma Agafesoota’i, e lē tatau i soo se matua ona ia ave lana tama poo lona alo i se taulasea poo se fofo Samoa ona e leai se vai Samoa poo se taulasea e mafai ona ia tapēina le siama lenei o le misela seia vagana ai lava vai mai le falema’i e tau fesoasoani ai i le mafatiaga o fanau mai le misela.
E fautuaina malosi mātua ina ia vaai muamua se foma’i a’o lei oo i nisi o’oo’oga aafiaga o le misela i le fanau.
O faiga tui nei o le misela na molimauina ai le toatele o fanau a le atunuu e lei faia muamua ni o latou tuipuipui o le misela, a’o nisi fanau e leai ma se tui e tasi ua faia talu mai le aso na fanau ai. Na vaaia le galulue malosi o le komiti o faalavelave faafuasei ma le Soifua Maloloina e faatino le poloaiga lenei a le Malo i le faia uma o tuipuipui o le misela, o nisi lava aiga na faatino le faia o a latou tuipuipui mai totonu o taavale vans a le Matagaluega o le Soifua Maloloina aemaise foi le komiti o gafa ma lea matafaioi. Ua faaaogāina foi auaunaga tau telefoni feavea’i e faasalalau ai le faatonuga lenei mai le Malo i le vave ona faafesootai le komiti faapitoa mo le faatinoina o tuipuipui o le misela.
O loo vaaia i le taimi lenei le galulue uma o itutino a le Malo ina ia lagolago ai le faatunuuina o lea faatonuga e ala i le faia o tuipuipui o le misela mo latou e tatau ona faamuamua e aofia ai fanau laiti ma le itupa o tamaitai e aga’i atu i le 35 tausaga le matutua. E lei mafai ona faailoa mai poo afea e faia ai tuipuipui mo tagata matutua.