“161 sui faatutū mo le Palota 2011”
O le Aso Faraile o le vaiaso asau e pa‘ū tonu i ai le aso 4 o Mati 2011, o le a faia ai le faigapalota tele a le atunuu. Peitai o le faaiuga a le faamasinoga maualuga ua teena ai le tulaga agavaa o sui tauva e toatolu o le Tautua Samoa ona ua lē faamalieina aiaiga o le Tulafono o Faigapalota, i le faia o monotaga, ma le atoa o aso e nofo ai i Samoa, o ni faigata ia ua feagai ma lea vaega faaupufai.
Ua faailoa mai e le Ofisa o le Komesina o Faigapalota le lisi o suafa o sui tauva ua faaulu ma lesitala mo le faigapalota tele a le atunuu i le aso 4 o le masina fou.
O le Aso Faraile, 18 o Fepuari 2011 i le tutonu o le la (12noon) na tapunia ai le lesitala o sui faatutū. I sui tauva a vaega faaupufai e lua, le Tautua Samoa ma le HRPP e manino mai i le lisi ua faalauiloa, e iai le isi sui tauva o le Tautua Samoa ua lē taunuu ona tausinio.
O ia lea o Faletaua Tafa‘ese Pemita mai le itumalo o Falelatai ma Samatau. Na faaalia mai e se molimau mai le Tautua Samoa, ua taofi e Samatau le tauva o Faletaua, ona o se finagalo o alii ma faipule.
E lei maua se finagalo o se matai o le afioaga peitai ua faaalia e le molimau faatuatuaina o le Tautua Samoa, ua usitaia e lo latou sui le faaiuga ua faia ia te ia, ona o le tausiga o le filemu. Ua toafā ai sui o le Tautua Samoa ua lē mafai ona tauva, e pei ona lē manuia le faamasinoga na finauina ai le agavaa o le afioga Leota Leuluaialii Ituau Ale, Tu‘ula Kiliri Lafi ma Tafilipepe Asalemo.
Ua iloa nei i le lisi o suafa o sui faatutū, ua leai ni faigapalota a itumalo o Lepa lea o loo tulai mai ai le susuga Tuilaepa Lupesoliai Sailele Malielegaoi, ma Anoamaa i Sisifo o loo seei ai le afioga Fonotoe Nuafesili Pierre Lauofo.
O lona uiga o itumalo faafaipule ia ua mautinoa o la sui faipule mo le paeaiga lona 15 a le Palemene.
Sa iai se sui na taumafai atu le afioga Leota Leuluaialii Ituau Ale e faaulu e sui tulaga ia te ia e pei ona ia faailoa i tusitala, o Gaugau Mateo.
Peitai e taunuu le tusitala i le ofisa o le Komesina o faigapalota ua ta tonu le 12 i le aoauli e tapunia ai le lesitala, o loo taumafai pea le afioga Leota e saili se avanoa mo se isi matai mai Luatuanuu e sui tulaga ia te ia ma avea ma sui tauva o le Tautua Samoa, ae ua lē maua le susuga Gaugau Mateo.
Faaalia e Leota na ia maua le telefoni, o loo auai lea tamalii i se semina tau i lana galuega. Na tuai tapena se sui o le Tautua Samoa mai Anoamaa i Sisifo, ona o le ‘afa o le iva o le taeao o le Aso Faraile 18 o Fepuari 2011 na lauina ai faaiuga o talosaga a sui na faaletonu a latou lesitala mo le avea ma sui tauva.
Faaalia e Leota e ui ina lē maua se sui mo le Tautua Samoa i lea itumalo, ae e lē o le mutaaga lea o le olaga tauivi i upufai o Malo. E 161 sui tauva o le palota i le masina fou, e ese mai ai sui o Lepa ma Anoamaa i Sisifo o le a leai ni palota.
O le faiga filifiliga a le atunuu i le tausaga e 2006 o loo faamauina ai e 190 sui na tauva i lea faigapalota tele a Samoa. O lona uiga ua telē se fuainumera ua faaitiitia ai i le palota o le 2011.
