Ua faamalieina le faamasinoga e pei ona saunoa le afioga i le Faamasino Sili, Patu Tiavaasue Falefatu Sapolu, ina ua mae‘a ona tuuina atu le molimau tuufofoga a le tofa Tu‘ula Kiliri, e tali ai i molimau tusitusia a le Komesina o Faigapalota faapea ma le Pulenuu o Saleapaga, faapea se matai tamalii o le afioaga, le afioga Falana‘ipupu Palea Emau.
O molimau tusitusia a i latou nei sa faaalia ai le leai o se monotaga a Tu‘ula o faia i le nuu, ma e lē auai foi i ni fono a le nuu i Aso Gafua e pei ona faia e isi afioaga.
O Tu‘ula o se sui faaolioli o le Tautua Samoa e tauva mo le itumalo faafaipule o Lepa lea o loo seei ai le afioga i le Palemia i le tofi faipule.
O aiaiga fou o le tulafono o faigapalota o loo faaalia ai e tatau i se sui e fia tauva i le palota ona faamalieina uma aiaiga e pei o le fai o le monotaga i le nuu, ma o se tagatānuu o Samoa sa nofo i le atunuu i totonu o le 3 tausaga a o lumanai le aso o se faigapalota.
I le molimau tusitusia a le Komesina o Palota le afioga Tanuvasa Meleisea Isitolo Lemisio, o loo ia faaalia ai le faamalieina o le vaega i le nofomau pea o Tu‘ula i Samoa, ae o le monotaga ua lē sainia e le Pulenuu le pepa faamaonia ona ua faailoa atu ia te ia e ala i se tusi, e leai se monotaga a Tu‘ula i le nuu.
O le molimau a le sui na ia faaalia ai o loo fai lana monotaga, ma na te ave tupe i le tuafafine o lona tamā o loo nofo i le nuu e faatino ai lea tulaga.
Sa ia saunia foi ni taumafa e faapea o ni ipu sanuisi sa tala‘i atu e nisi o lona aiga e faapea o le saogamea a le nuu, mo le fafagaina o tagata na o atu i Saleapaga i le sauniga o le atoaga o le tasi le tausaga talu ona tuanai le sunami poo le galulolo.
Sa ia faaalia foi i lana molimau, na ia uaeaina moli eletise o le faleaoga o Saleapaga, ina ua feiloai atu ia te ia se tasi o matai tufuga o le galuega o se matai lava o le afioaga, le afioga Sogimaletavai.
O ia vaega na te talitonu o le isi lea o tautua i le nuu.
Peitai ina ua fesiligia e le Faamasino Sili pe totogi le galuega na ia tali e totogi, auā o le tuutuuga lea ma le matai tufuga.
Na ave le avanoa i le Pulenuu o Utaulu Viiga e fesiligia ai Tu‘ula ona o le alii Pulenuu o loo faasaga foi i ai le talosaga ma le Komesina o faigapalota.
“Lau tofa Tu‘ula, o fai sau monotaga? Na saunoa le Faamasino Sili ia Tuula poo le ā lana tali.
“Lau afioga e leai se isi a‘u tala o lena ua ou faailoa atu o a‘u e fai la‘u monotaga. Peitai sa faaalia e le Pulenuu i luma o le faamasinoga e leai se monotaga ma e lē auai foi o ia i ni fono vaiaso.
Ina ua mae‘a le molimau a lē ua talosaga mo se faaiuga a le faamasinoga i le teena o le sainia o lana pepa faamaonia e le Pulenuu, na saunoa ai le alii Faamasino Sili, ua faamalieina le faamasinoga e leai se monotaga o faia. Na faaalia e le Faamasino Sili, o le monotaga e fai uma mea i totonu o le nuu e aofia ai mea faalelotu, faapea ma le auai i fono.
