O le komiti galulue o le Samoa Ala Mai, lea ua taulamua ai nisi o tina ma tamaitai e faamalamalama ma faailoa le autu o le fuafuaga a le Palemene, e siitia le numera o tamaitai e avea ma faipule.
Ua latou faailoa i le mae‘a o nisi o faatasiga ma tina o le atunuu e faapea e toafitu tamaitai e ono tauva i le faigapalota tele o le tausaga fou mai itumalo o le motu i Savaii.
O loo faagasolo nei tapenaga a le Samoa Ala Mai, lea ua taitaia e nisi o tina ma tamaitai e pei o le Afioga Lemalu Nele Leilua o le taitaifono, o le sui taitaifono o le Afioga Maiava Visekota Peteru. O le latou failautusi o le faletua le Afioga Mulipola Anarosa Molioo, ae o le teutupe o le Afioga Vaimasenuu Zita Martel.
E toafitu isi tina ma tamaitai o loo avea ma sui o lea komiti galulue e aofia ai Vaasilifiti Tevaga Moelagi Jackson, Taulapapa Mulipola Elaine Meleane Silva, Toomata Norah Leota, Vaiuila Laulu Sio (Savaii), Malaetele Afualo Mulivai (Savaii), Siufofoga Vaelua (Savaii), Maseuli Ema Laufiso (Savaii).
Ua faaalia e le komiti o taumafaiga o loo faagasolo nei, o loo sailia ai finagalo mai tina o le atunuu, ma le itu tāua o le unaia lea o le lagolago mai tagata moni o sui tauva tamaitai o le a ofi atu i le sailiga o ni sui faipule o le Palemene.
Ua mae‘a ona feiloai atu se savali a le Samoa Ala Mai i taitai o vaega faaupufai le HRPP ma le Tautua Samoa, ma faailoa i ai a latou galuega ma le faamoemoe autu o le komiti. Ua faamanino mai foi e le komiti e leai se fesootaiga o le latou taumafaiga ma ni pati faaupufai.
