O se talosaga mai le afioaga o Laulii i Samoa mo se faleaoga fou na vaaia ai le potopoto faatasi o le nuu, aiga uo ma ē masani i le Malu a Papa Hall a le EFKS i Fairfield i Sini mo le tusigaigoa i le Aso Toonai ua tuanai atu. E pei ona silafia o le mauga tapuai foi lenei ua loa na folafolaina ai le talalelei e le lupe faalele a le afioga i Niu Sa Uelese nei, le susuga ia Rev Peleti Toese Toailoa ma le faletua ia Senetenari.
Na maualuga foi ma matagofie le aso i le faatasi mai o le Afioga Leniu Taliulu Vainiu Te‘o ma le faletua ia Peta mai Samoa faapea uso ma tuafāfine e molimauina lenei faamoemoe.
E lē gata i lea na masii mai foi nisi o le afioaga mai Niu Sila aemaise Setete e fia o Ausetalia nei auā le opogi o le faamoemoe.
I Sini nei e lei malolo ma nofonofo lelei foi aiga aemaise uo a suli o lenei afioaga lea foi ua iloga a latou tautua i totonu o Sini e pei o le tamaitai faasalalau leitio ia Muailemoli Toailoa Tiatia ma lona alii ia Tiatia Ben lea e pulea se pisinisi ofisa malaga mai le pitonuu o Campbelltown.
O le faaiuga o le faamoemoe na faailoa ai le aoina o le meaalofa e tusa ma le $103,000 mai le alofa tulai o aiga, uo ma ē masani a le afioaga na aofia atu e fia patipatia lenei faamoemoe tāua mo le afioaga pele i Samoa.
E tele nisi o loo manatua pea le avea pea o le Malu a Papa ma sulufaiga o soo se alalafaga mai Samoa e autovaa mai mo nai sailiga seleni auā atinae o ekalesia ma galuega faapena.
O le malaga mai foi a le HRPP faatasi ai ma le taitai o le Malo le Afioga i le Palemia Lupesoliai Tuilaepa Sailele Malielegaoi na taunuu uma mai lava i le EFKS a Fairfeld lea foi na faia ai ma le sauniga o le Tsunami i le 2009.
