O loo te‘i le Palemia o Samoa ma lona lē talitonu ina ua afea ona tiute masani i se valaau atu i ai a se tasi o tusitala o le leitio faavaomalo a Niu Sila o loo tautuaina le Pasefika i tala tau logologo o mea eseese e tutupu, ona o le fesiligia o sona finagalo i le lipoti ua salalau ua faaalia ai o loo sipai Niu Sila i faamatalaga a nisi o atunuu o le Pasefika e aofia ai Samoa.
“O le mea la, ua ou magakua vave a le kala a le alii lea o Sumeo, ua oso le ke‘i ku i luga o le me‘i. O le makaupu lega ua kau oso ai ma loka mimika, auā o le kele a o kakou kalagoaga e faasamoa.
O le la ua ou kalagoa i le Hai Komisi (Niu Sila) se‘i tingo a i o ia Key, poo ā gei mea valea e sau. Poo ā gei pa‘upa‘u e vevesi mai ai ia kamaiki. Auā o kusikala foi a Giu Sila ma le au faikakala e leai a se mea e ese ai ma le kakou foi kegi, e lavea i le mea lea o le ‘ai oso. Ia ke au a ia ou ke lē iloa poo ā gi mea aogā oi i a kakou”.
O se vaega lea o le finagalo o le Palemia susuga Tuilaepa Lupesoliai Sailele Malielegaoi, ina ua feiloai ma tusitala i le Aso Tofi ua mavae i lana feiloaiga masani i vaiaso taitasi. Na faaalia e Tuilaepa sa fesili i le tusitala na valaau atu pe moni, ae alu atu le tali e leai.
E ui ina lē mautu se finagalo o le Palemia o Samoa i le mataupu, ae ua agiga i lipoti a nusipepa ma leitio faapea televise le salalau mai o lipoti a le alii tusitala o Nicky Hager ua ta‘ua ai le aoina e le vaega o suesuega faasipai a Niu Sila o faamatalaga mai Samoa, Tonga ma isi motu o le Pasefika ma ave i le vaega o faamatalaga faalilolilo a le Malo o Amerika.
O loo faaalia ai foi e lea alii tusitala o loo mafua ona ave i Amerika nei faamatalaga ina ia fuafua ai gaoioiga tau i le puipuiga a Amerika ia ogatasi ma gaioiga faapea a le Malo o Niu Sila.
Ua faaalia e Tuilaepa o le tiute lea o sui o Malo i fafo o loo i Samoa o le ave o faamatalaga i mea e tutupu i le atunuu. Na ia ta‘ua o le tiute o Hai Komisi ma Amepasa o le faitau i nusipea poo ā mea o tutupu ona latou logo lea o taitai oo latou Malo. E pei foi ona faia lea tiute e sui o le Malo o Samoa o loo i fafo.
O le aliali mai o lenei mataupu o loo manatu le Palemia o le malo tuaoi o Tonga, ua oia ai sootaga lelei o Niu Sila ma malo o le Pasefika.
Ua avea foi lenei mataupu ma luitau i le Palemia o Niu Sila ona ua aliali mai e moni faamatalaga ua salalau nei i le siapi o le malo i faamatalaga ma la‘u i le vaega sipai a Amerika.
O le finagalo o le Palemia o Samoa afai o iai ni tulaga faapea, e mafua ona fai ona o le itu i le puipuiga.
