O le Aso Lua o le vaiaso nei e mae‘a ai faatalanoaga poo interviews mo i latou ua talosaga i le avanoa o le Komesina poo le faauluuluga o le Matagaluega o leoleo a le Malo Tutoatsi o Samoa.
A o tatali le matagaluega poo ai o le a tofia ma filifilia, e lē o nofonofo lelei lagona o le pulega o le matagaluega ina ua maua atu se faaaliga o loo ua iai ni aiaiga fou o loo tau faaofi i le filifiliga o se Komesina.
O lea suiga e faapea mai se molimau mai se tasi o Komesina Lagolago, o loo afua atu i le Komisi e pulea tagata faigaluega a le Malo le Public Service Commission poo le PSC. O loo manaomia le tatala o le avanoa e mafai ona talosaga i ai ma i latou e lei galulue o ni leoleo.
O le tausaga e 2013 na pasia ai e le Palemene se teuteuga i le Tulafono a Leoleo le Police Act e faasino i le filifiliga o se Komesina, e pei ona aiaia e tatau ia i latou e talosaga ona oo i le tulaga faaleoleo o commission officers poo i latou o taitai leoleo ma ia ausia le umi e sefulu tausaga talu ona galue.
O loo aiaia foi le tatala o le avanoa e talosaga ai i latou mai tua sa galulue faaleoleo e lē gata i Samoa ae o se isi atunuu ae ia ausia le aiaiga e sefulu tausaga ma sa avea foi ma taitai leoleo.
O le suiga ua tau faaofi nei, o le mafuaaga lea o le gugulu o le matagaluega mai lava i le pulega e oo i le lautele o le vasega o alii ma tamaitai leoleo.
O le mafuaaga lea o le ave o se tusi mai le Asosi a leoleo o loo galulue i le Minisita o le matagaluega le afioga Sala Fata Pinati, ua faailoa ai lagona lagomia o le asosi.
“Ua ave le matou tusi ma le naunautaiga ia silasila i ai le Palemia ma le Kapeneta ona e lē o talafeagai le fuafuaga o loo faatulai mai i se suiga vave e faia i le filifiliga o se Komesina, ae o loo taoto le teuteuga o le tulafono ua pasia e le Palemene e saili ai se Komesina”, o le finagalo lea o le Peresetene o le Asosi a Leoleo le tofa Fata Manuele Pemita ina ua fesiligia i se gaioiga a le asosi o faia faasaga i le mataupu ua aliali mai.
“O le tatalo lava i le Malo ia silasila i aiaiga ua mae‘a ona faia, ona e lē fetaui pe a tuu i ai se isi suiga fou e ese mai aiaiga o loo i le tulafono”.
O le faatalatalanoaga o loo faia e saili ai se Komesina o loo iai le talitonuga e to‘a sefulufā o loo auai ma oi latou uma ia na talosaga. Peitai na maua se isi molimau i le afiafi o le Aso Faraile na tea nei, na faailoa mai ai e na o le toafitu ua faatalatalanoa.
O le faamatalaga foi mai le molimau e faapea e iai nisi o alii leoleo sinia na talosaga ua aveese o latou suafa mai le lisi oi latou o loo faatalatalanoa. E lei maua se faamaoniga o lea molimau, ae oi latou o loo talosaga o loo aofia ai ma nisi e lei galulue o ni leoleo.
E manatu le Peresetene o le asosi a leoleo o loo galulue ma tautua, afai e iai se isi suiga o finagalo i ai le Malo e ao ona laolao muamua i le toe faia o se isi teuteuga i le tulafono.
“Ae o le matou lava lagona e tatau lava i se tasi e avea ma faauluuluga o le matagaluega ona iai sona tomai ma se poto masani i le galuega faaleoleo”.
O loo talosaga i le avanoa se tasi o faauluuluga o se matagaluega a le Malo faapea se tamaitai sa avea ma faipule o le Palemene o Niu Sila i le paeaiga faapalemene a lea atunuu ua mavae atu, a o lei faia le isi palota tele na filifilia ai le paeaiga faapalemene a Niu Sila o loo iai nei.
O se tasi o vaega ua faailoa mai, ua uma ona fai se faaiuga a le Kapeneta ua faaoo atu i le pulega o le matagaluega o leoleo ua filifilia ai Komesina lagolago e avea ma Sui Komesina amata atu i le masina nei o Mati e oo i le masina o Iuni.
Tasi lea o vaega o loo nunumi ai le matagaluega, ona ua filifilia Komesina Lagolago e oo i le Sui Komesina, ae o lea ua faia faatalatalanoaga o le avanoa mo se Komesina.
