O le tausaga e 1999 na amata faavae ai le Taupou Manaia lea na amata mai Amerika Samoa, oo mai ai i Samoa i le faamoemoe e faatumau le siva a le tamaitai Samoa i lona tulaga e faatumau ai lona matagofie, ma ia aua ne‘i suia.
E toatele alo tamaitai talavou o le atunuu ua ofi atu i le aoga o siva faa-Taupou a le Taupou Manaia ma ua molimauina le lelei tapena ai o fanau teine a le atunuu e fia aoaoina ma faatumau ai pea lea siva tāua a le atunuu.
E ui lava ina faapea ua iai ni suiga ae o le molimau a le toatele, e tulaga ese siva o loo faatino e le Taupou Manaia ona o loo faatumau ai le gaioi a le tamaitai Samoa pe a saasaa, i le faamaliuliu ma le faatino‘ao, a o le vavai o le tino ma le see.
Ua tele suiga mai fafo ua lofia ai siva a le atunuu e pei ona silasila i le tele o faafiafiaga faasamoa i nei aso, peitai o le avea o le Taupou Manaia ma sui o le atunuu i le faaaliga o le Pasifika Festival, e iai le talitonuga o le a mafai ona faailoa atu ai i tupulaga o Samoa na ola ma soifua a‘e i Niu Sila taga o siva faa-Taupou ma le siva a le tamaitai Samoa.
O le Aso Toonai na tea nei i le afiafi sa faatumulia ai aiga ma mātua o tamaitai o le ausiva a le Taupou Manaia, i se faaaliga na latou folasia ai a latou tapenaga mo le faaaliga o tu ma aganuu faa-Pasefika i Niu Sila i le vaiaso asau.
O se taumafaiga foi na avea ma sailiga tupe e fesoasoani ai ia latou tapenaga auā lea faamoemoe.
O le toatele lava o mātua e ana fanau o loo i le ausiva o nisi o loo tulaga lelei ma mautofiga i galuega a le Malo e pei ona avea ma faauluuluga i nisi o Matagaluega ma faalapotopotoga a le Malo.
O nisi foi o le au faipisinisi iloga o loo iai o latou alo ma fanau i le ausiva. O le aumalaga lenei o le a taitaia e se tasi o tamaitai iloga lona tulaga i galuega le susuga Laeimau Oketevi Tanuvasa, o loo faauluulu i ai le kamupani o fesootaiga faaonaponei o le Computer Service Limited le CSL. O ia o le a nafa ma le vaaia o polokalame uma mo le Taupou Manaia a o iai i Aotearoa.
O loo iai le faamoemoe e faia se isi a latou faaaliga e saili tupe ai foi pe a taunuu i Niu Sila, a o lumanai le faaaliga o le Pasifika Festival.
Tasi lenei o ausiva e mataina a latou faafiafiaga pe a faafiafia i le Teuila, ma o se avanoa lē aumaua lenei e silasila i ai lo tatou atunuu, i le faaaliga o le Pasifika Festival 2015.
