E lē sālā upu mai anamua i le talitonuga faa-Kerisiano o Samoa a tapuaia se faagaatama e lē taumate le iu manuia.
E faapena se lagona na manatu ai le sui tauva tutoatasi o le itumalo o Logan City le tofa ia Seugamalii Josephine Aufai ina ia talosia i se sauniga lotu lona faamoemoe e valaaulia faapitoa ai le toatele ina ia tapuaia faatasi.
Ua lalata le vaivaa ma ua lē toe mamao ona iloa lea o le auro i le afi. O le naunautaiga o le faletua ia Seugamalii Josephine Aufai, e fia fesoasoani i se manaoga o nai o tatou tagata aemaise le toatele o isi gagana o aumau i le itumalo o Logan City e ala i se leo i faalagamaea a le itumalo ma ana upufai.
E toatele nisi o le atunuu, tauaiga, uo, ekalesia ma paaga ma nisi ituaiga ua latou sauni e lagolago ma tuu atu o latou faatuatuaga e lagolago lea tamaitai sailimalo i lona tulai mai e tamoe mo le tofi.
O le afiafi la o le Aso Sa ua tuanai sa faia ai le sauniga lotu e tapuaia ai le alofaiva o le faletua ia Seugamalii Josephine Aufai a o alo atu e tauva mo le tofi Councillor i le Division 2 i le itumalo o Logan City.
O lea sauniga lotu sa valaaulia faalauaitele soo se tasi, lea na faataunuuina i le malumalu o le ekalesia Hossana Brisbane Church, susuga ia Pastor Manuia & Ruta Aloalii i Logan City.
Na taitaia le sauniga e le susuga ia Pastor Ross Smith faapea se saunoaga a si ona tuaa ia Rev Afoa Tuuga Stevenson e faamalosia ai o ia mo le sauni atu i le faigapalota i le masina fou.
Talitonu o le a lagolagoina e Samoa i lea itumalo Josephine auā foi le agiagia o le tagavai a Samoa i lona faamoemoe, e lē o mailoa pe o se tasi lea o toa o Samoa e ono oo atu lava i le Palemene faasetete a Kuiniselani i se taimi o i luma pe a taunuu lana miti ua leva ona momoo i ai.
O le aso o le palota o le Aso Toonai aso 19 o Mati 2016. I se aiaiga a le ofisa faipalota, o loo matuā faamalosia pea tagatānuu uma o Ausetalia ua sitiseni, 18 tausaga ma luga atu o loo aumai i Kuiniselani ina ia resitala ae palota i lea aso auā e mautinoa le sala pe a lē palota.
E lē gata o Logan City ae faapea foi isi itumalo. Mo nisi faamatalaga i le fia lagolago i le tofa ia Seugamalii Josephine Aufai, e lelei le fesootai ane i lana facebook page (Josephine Tuuga Aufai).
