O le ogatotonu o le tausaga ua mavae 2015 na faatau atu ai e le faletupe o le Westpac lona lala i Samoa i le pulega o le faletupe mai Papua Niukini o le Bank South Pacific poo le BSP. A fua i ai e lei atoa se 12 masina o lea fefaatauaiga ae ua vaaia le fofola mai o le agalelei o lea faletupe fou i manaoga o tagata Samoa e ala ia latou foai e lē gata o seleni a o isi meatotino e faaaogā i le atinae o taaloga.
O le faletupe lenei ua pulea e se alo tamaitai o le atunuu o ia na tauaaoina foai a le faletupe i le Aso Faraile ua mavae. O le foai tupe e $5,000 na tuuina atu i le taitaifono o le komiti o mavaega sailitupe le faletua o Adele Kruse o loo faamaopoopoina le fesoasoani mo pisinisi na afaina a latou oloa ma isi meatotino i le mu o le maketi i Savalalo i le amataga o le tausaga.
O le saunoaga a le tamaitai pule o le faletupe o le BSP le faletua o Maryanne Lameko-Vaai, sa ia faailoa ai o le agaga o le faletupe o le lagolago i mafatiaga o pisinisi na aafia i le mu, lea ua soosoo tau‘au ai ma isi faletupe i le atunuu e faavae ni teugatupe e avatu iai foai a le atunuu.
Na saunoa le taitaifono o le Samoa Offering Hope le faletua o Adele, e pei o se amataga lenei o se taumafaiga faapea i Samoa ae o le faamoemoe ia faatumauina pea mo le lumanai mo nisi faalavelave faafuasei e tulai mai ma aafia ai tagata o le atunuu.
O ni teugatupe ua faia i faletupe faapisinisi e fā i le atunuu e mafai ona lafo sa‘o mai i ai fesoasoani a nisi i atunuu i fafo ma o se auala lea e mautinoa lelei ai e i latou e lagona le loto fia fesoasoani o loo saogalemu a latou seleni ma alu sa‘o i tagata o loo manaomia le fesoasoani.
O le Aso Faraile foi ua mavae na faia ai le foai a le faletupe o le BSP i le aulakapi pa‘i poo le touch rugby team a Samoa e ala i se togiga mo ofisa ma tagata e faafoeina taaloga mo le au a le atunuu.
Na faaalia e le tamaitai pule o le faletupe e taugata le togiga ae ua lē mafai ona tuua le agaga fia fesoasoani i le atinae o lea foi taaloga.
Na taualuga foai a le faletupe o le Bank South Pacific i le $10,000 ua tauaao atu i le atinae o le lakapi mo fanau aoga le Rugby Academy o loo faafoe e le susuga Mase Mahonri Schwalger ma nisi o alo o le atunuu ua iloga i le lē tomai i le taaloga.
E lē gata i le foai tupe ae o avanoa sikolasipi ua maua e nisi o fanau o loo i le polokalame ua totogi ai e le faletupe a latou aoaoga ma faaauau pea ona auai i le atinae o le lakapi. O polo lakapi foi ua tusia ai le igoa o le faletupe ua maua e le polokalame ma o aiaiga o le foai ia faaaogā e le polokalame ia latou faalauiloa le igoa o le faletupe.
