Ua savali nei le tolu tausaga talu ona tuanai le faaiuga a le Faamasinoga o Fanua ma Suafa i Mulinuu na poloaina ai le toe foi o le afioga Leota Leuluaialii Ituau Ale i lo latou nuu o Solosolo. Peitai e lē o mafai ai ona talia le toe ulufale o le afioga i le Faasisina i le faiganuu, e ui o le finagalo o Alii ma Faipule ua talia le toe nofoia e Leota ma lona aiga o lo latou fanua ma a latou meatotino. O le mafuaaga lea o se isi talosaga a le tamalii ua taoto i le faamasinoga o Fanua ma Suafa ina ia faia se poloaiga e mafai ona toe oo ai i le faiganuu.
O le Aso Faraile na tea nei 3 o Iulai 2015 na valaauina ai le mataupu mo se suesuega a le faamasinoga. Peitai sa faailoa e le sui Peresetene le afioga Luamanuvae Palesoo Esera, ua lē mafai ona o ni tusi ua oo atu ua faailoa ai le lē mafai ona auai o nisi e tatau ona iai i le suesuega. O le afioga i le Sui palemia o se matai o Solosolo, o Fonotoe Nuafesili Pierre Lauofo, o loo malaga i fafo faapea se tusi a le Pulenuu o Solosolo.
O se isi mafuaaga o le tolo o le faamasinoga ona e lua ni apili o loo taoto i le faamasinoga e faasino i le faaiuga na faia i le tausaga e 2012 ma se isi mataupu na muamua atu i le va lava o Leota ma lo latou nuu o Solosolo.
Faaalia e le sui Peresetene o nei apili e tatau ona suesueina muamua ona faatoa mafai lea ona tagofia le mataupu ua toe momoli atu e le afioga Leota Leuluaialii Ituau Ale. Peitai sa talia e le sui peresetene le avanoa e faaalia ai se finagalo o le tamalii.
Sa faailoa ai e Leota lona faanoanoa ona e na o le lua lava itu o le mataupu ae ua lē mafai ona suesueina. Sa ia faaalia foi lona faanoanoa ona e foliga mai ua aafia polokiki i le tologa o le mataupu aemaise o le tusi na lauina mai le tofa Nuafesili Pierre poo le Sui palemia sa ia talosagaina ai le faamasinoga ia tuu atu ia Tesema o le tausaga nei e fofogaina le mataupu.
Sa faailoa e Leota i luma o le faamasinoga o le suavai o lo latou aiga poo le paipa na motusia mai i le 2012 e lei toe faaolaina, o le isi lea atugaluga ia te ia ua leai se suavai e tua i ai mo mea fai o aso uma.
Peitai e ui i le folasaga a le tamalii ae sa manino le faaaliga a le sui peresetene o apili o loo taoto e lei fofogaina se isi pogai autu o le lē mafai ona suesueina o le mataupu. Sa faailoa e Leota sa ia totogi le limaselau tala e faanatinati ai lana mataupu ae ua lē faaauauina, ae sa faailoa i ai e le sui peresetene e mafai ona toe tuuina ane lana seleni e le faamasinoga ona ua lē mafai ona tagofia lana talosaga ona o mafuaaga ua faaalia.
