“Ia aua ne‘i vivini se moa folau”
O faaletonu ua tuanai sa vae manu‘a ai le sootaga mafanafana o le iuni lakapi a Samoa ma nisi o tama o le Manu Samoa, ma oo ai lava ina feosuaina le lotoifale o le taaloga ma lona pulega ona o manatu faaalia o le toatele i faaletonu na aliali mai, ua faasola uma ia futia i lagona o tagata ae ua tuu atoa le tapuaiga i le taaloga faitaulia muamua a le Olopeleki ma le Manu Samoa o le a faia i Samoa i lenei vaiaso le Aso Lulu 8 o Iulai 2015.
O fua aliali o le lagolago ua molimauina i tapenaga a le atunuu atoa i le talimalo ai i le malaga mai o le au lakapi logologoa a Niu Sila le numera tasi i le lalolagi le All Blacks. O fu‘a ua agiagia solo nei i soo se vaega o le atunuu, o teuteuga o nuu ma aai, aemaise o tusitusiga i soo se vaipanoa o loo faalauiloa ai faaupuga faamalosiau, o le pine lea o le sauni ai o le atunuu e tapuaia le taaloga a ana tamafanau.
O se lagona uigaese lea ua vaaia i Samoa i le vaiaso ua mavae a o lumanai le vaiaso o le taaloga, ona e lē gata i teuteuga o nuu ma afioaga ae faapea i tagata ua lē misi se aso ma vaaia le laei o le lanu moana e faailoa ai le latou lagolagoina o le Manu Samoa ma lona sauni atu i le taaloga faitaulia muamua ua faia i Samoa i le va ma le Olopeleki.
O le faalauiloaina o le ‘au a le Manu Samoa i le amataga o le vaiaso ua mavae na saunoa ai le afioga i le Palemia o le taitaifono o le Iuni Lakapi le susuga Tuilaepa Lupesoliai Sailele Malielegaoi, ma ia faailoa i le aulakapi a le atunuu, o le fatu o tagata Samoa uma o lana Manu Samoa. O le mafuaaga lea o le liliu atoa o le atunuu e faia ana tapenaga. O nuu e lē oo i ai le Olopeleki o loo faapena foi ona teuteu faamatagofie ma o le molimau ola lea o le maualuga o le tapuaiga a Samoa.
O le lipoti mai i pulega o faletalimalo tu taulaga ua leai ni avanoa o potu, o lona uiga ua matuā tumu uma ona o le toatele ua malaga e maimoaina lenei taaloga ua faamauina nei i talafaasolopito o le lakapi a le lalolagi, aemaise o Samoa lava ia.
Taatia ia aulakapi malolosi i isi atunuu e pei o Aferika i Saute, ma le Wallabies a Ausetalia ae o le Olopeleki a Niu Sila sa leai se manatu e mafai ona tulaueleele i se atunuu laitiiti e pei o Samoa mo sana taaloga faitaulia, a o lea ua taunuu.
O se isi lea o matatia ua ausia i le atinae o le lakapi a le atunuu i lenei vaitau, e ui ina tele futia ma faaletonu sa aliali mai i ni tausaga ua mavae. Tatou tapuaia le alofaiva o le Manu Samoa, ae ia tatou onosai foi ma faapalepale pe afai o le ā se taunuuga o le a oo i ai le taaloga.
