Na molia muamua le alii o Esekia Manase i le moliaga o le faaoolima i le aso 13 o Iuni 2013 ma sa totogi ai lana sala tupe e $150.00, peitai o lea ua toe tulai i le Faamasinoga i nisi moliaga faasolitulafono.
O le moliaga o le umia o se aupega matautia (maa) ma le tauai maa na faamaonia e le Faamasinoga ina ua ioeina e lē ua molia i le aso 9 o Iuni o le tausaga nei.
O Esekia Manase o se tane o Faleapuna ua 20 tausaga lona matua ma e lē o se taimi muamua lea ua tulai ai i le Fa’amasinoga, ma o lē na tagi i lenei mataupu o Emelio Leti o se tane o Tiavea.
O le tolaulauga a le itu a leoleo i luma o le Faamasinoga Faaitumalo na faailoa ai e faapea o le aso 25 o Mati na tulai mai ai se feeseeseaiga i le va o lē ua molia ma le atalii o lē na tagi. O le aso 23 o Me o le tausaga nei na tauai ai e lē ua molia le fale o lē na aafia ma lavea ai lona afafine. Na agai atu leoleo ma aumai lē ua molia ma logoina i lana solitulafono. Na saunoa lē ua molia i luma o le Faamasinoga, ua uma ona oo i le aiga na aafia ma faatoese i ai ma ua talia foi lana faatoesega. Ua lagona foi lona sese i lana gaioiga sa fai ma o ia sa faasua‘ava i le taimi na tulai mai ai lea mataupu.
Na fesiligia e lana Afioga le Alii Faamasino ia Fepuleai Ameperosa Roma lē ua molia, pe na manatua se tala a le Faamasinoga ina ua tulai muamua i se isi moliaga, ina ia faaaogā tatau le avanoa a o lea ua toe tulai. “E foliga mai ua fia oo lē ua molia i le aai o Tafaigata”, le saunoaga a le faamasino.
O le faaiuga ua oo i ai lenei mataupu ua tuuina atu i lē ua molia, le valu masina e nofo vaavaaia ai i moliaga uma e lua ma le 80 itula e galue ai mo le lelei o tagata lautele.
