O le fua e te lulu e te toe seleseleina. E galo uma tiga na feagai ai ina tauia loimata o le mafatia ma le pologa ae inu malie le faaeaina.
O Cheryl Ramona Meleisea na faauu mai i le Iunivesete o Griffith (Griffith University) i lona faaailoga o le Bachelor of Laws i le Aso Lua aso 10 o Tesema.
O se lu’itau tele i lenei tamaitai talavou a’o alofaiva i a’oa’oga i lona molimauina o si ona tuaa e galue malosi ma finau e galue auā se manuia o i latou le fanau.
O le lua o tausaga talu ona vevela le taua o mafaufauga, na manatu ai Ramona ua alofa i si ona tamā o le a faagata lana a’oga ae o le a galue loa i luga o vaalele (Flight attendant) peitai, na tali le toeaina, “Ramona, e iai le isi laasaga e sili atu, ae afai ua e lē gafatia le a’oga, ia ua lelei, ae ou te lē manao lava i ni au tupe, o loo mafai lava ona ou tausia le tatou aiga ae faaauau pea ia uma lau a’oga.”
Ua matuai mauaa ma talitonu Ramona i le tāua tele o le usitai ma faalogo i mātua. Na saunoa faamalosi’au le tamā ia Fuāmatu Toaiva Meleisea (66 tausaga) i si ona alo e tatau ona filigā ma finau i a’oa’oga ia oo i le sini e gata ai nai lo le manao vave i tupe ae lē o le tali lea.
Na liusuavai lagona o le tamaitai i apoapoaiga a si ona tamā ma toe faaauau ai le a’oga. O le faaeaina, o se aso ese i lagona o le fiafia e lē gata o Ramona ae sili i nai ona mātua ma aiga ina ua mapuea mai lana finauga faalea’oa’oga ma maua lona faailoga.
O tuaa o Ramona o le afioga ia Fuāmatu Toaiva Meleisea (Poutasi Falealili) ma le faletua ia Susana mai afioaga o Fatausi Safotulafai, Safune ma Matautu Falealili.
Ia manuia tele lou olaga Ramona, ma ia taunuu lau miti i le isi laasaga o lou olaga e pei ona e alo atu iai mo le sueina o lou faaailoga o le Masters pe a tusa ai ma le finagalo o le Atua.
Alofaaga ma faamanuiaga mai ia Nana Iliafi Va’ele, aunties, uncles, cousins ma fanau, ae faasilisili ai alofaaga mai ou mātua pele o Fuāmatu Toaiva ma Susana Meleisea faapea uso ma tuagane taitoalua ma fanau ma aiga uma i soo se tafa o lenei kelope. Manuia tele lou ola tuputupu a’e Ramona. Malo le faaea aiga, viia le Atua.
