Mafutaga Patamea i Aukilani

Mafutaga Patamea i Aukilani

O le savali ma le faatalauula mai o le susuga i le faafeagaiga ia Rev Tanielu Tupuse Aiga ma le ekalesia EFKS i Patamea i alo ma tama fanau o le afioaga o Patamea o loo alala ma aumau i Aukilani e ala i se fesoasoani i le totogiina o le aitalafu a le ekalesia i le fausiaina o le malumalu tapuai i Samoa, na le toe alo ai se isi o lenei afioaga i le ata o le niu e lafi ai, ae ua galulue faatasi ma pulupulu lima i se auala e ono saili vave ai se seleni aua le taliina o le valaau a le ekalesia EFKS i Samoa.

E le faigofie le olaga i Niu Sila, ae ua galo nei mea uma ina ua manatua e le tagata lona faasinomaga ma lona tupuaga, ae le mafai foi ona galo le ekalesia na faafailele ma fofoa mai ai le olaga aoaoina i le ola faaleagaga ma le faaolataga. O le ala lea na tulai ai tama fanau o le nuu mai i tama ma tina matutua seia oo lava i fanau iti, aemaise o ana taulaga soifua o loo galulue i fata faitaulaga e fia o Aukilani ma faamaopopo le mafutaga a Patamea i Aukilani ona o le naunau ia maua se mafutaga e talia le savali a le ekalesia mai Samoa. O le masina o Iulai na faatoa amata ai le mafutaga ma e sefulu tolu matafale o lea ua auai i le faamaopopoina o lea mafutaga.

O le aso Toonai ua mavae 27 o Oketopa na galulue ai loa le mafutaga lenei e faatino se sailiga tupe e ala i le latou po siva lea sa faataunuuina i le komuniti hall i East Tamaki e faamaopopo ai se seleni aua le aitalafu a le ekalesia i Samoa. Se mea ina lelei o uso ae mafuta faatasi ma nofo fealofani, e faigofie ai ona faataunuu i soo se faamoemoe, ua taulamua lupe faalele a le nuu o Patamea i Niu Sila i le faatinoina o le polokalame i le aso Toonai a pei ona auai ai le susuga i le faafeagaiga ia Rev Maoge Leausa ma le faletua ia Faafetai Leausa faapea ma le susuga i le faafeagaiga ia Rev Samoala Lauano Siutu mai le ekalesia LMS Toefuataina, ae lei tuua ai le fesoasoani a nisi o faifeau toeaiina o le ekalesia EFKS i Aukilani i Niu Sila nei, faapea ma nisi o sui o aulotu sa tali atu i tusi valaaulia.  O le susuga i le faafeagaiga ia Rev Maoge Leausa na saunia le sauniga lotu e amataina ai le polokalame o le aso, ona tatala aloaia loa lea o le po siva i le sausaunoaga a aiga o le susuga i le faafeagaiga i Samoa ia Tanielu Tupuse Aiga ma lona faletua o loo auamau i Aukilani.

Na faasolo i ipu a nisi o lupe faalele a le afioaga o loo i Aukilani nei ona see ane lea i ipu a aiga o le mafutaga, ae lei tuua ai nisi o aiga na alolofa atu aemaise o uo ma e masani na tauala atu nisi o latou tusi valaaulia i nisi o alo ma tama fanau o le mafutaga.

O le afioga i le taitaifono ia Lauano Neemia Tauti na taualuga iai ipu o le aso ma faaiu ai loa i le tolauluaina o le maau ma le milomiliosia o le mamalu o le atunuu aemaise o tama fanau o le nuu o Patamea i Aukilani. O le susuga ia Malumalae Amosa sa fai ma fofoga o le aso ao le failautusi o le mafutaga ia Vaifale Filisi Falefatu sa fai ma sui o le mafutaga e momoli le agaga faafetai i le paia o aiga o uo ma e masani sa alolofa atu i le faamoemoe o le afioaga i Aukilani faatasi ai ma faaaloaloga mulimuli aua le paia o Samoa potopoto sa auai.

E $46,800.00 le seleni na tauaaoina e le mafutaga a Patamea i Aukilani ma ua tuuina atu loa lea seleni i Samoa e tali ai le valaau mai a le susuga i le faafeagaiga ma le ekalesia aua le malu o le Atua.

E selau ma ona tupu afe le aofaiga o le aitalafu ae ua iai le faamoemoe o le mafutaga iinei ua lava ma totoe le fesoasoani a le mafutaga a Patamea i Aukilani nei mo le faamoemoe o le ekalesia i Samoa.