O le taua o lenei polokalame mo le silafia e faaosofia ai manatu ma lagona o nisi, e faamalosia ai foi nisi.
O se polokalame ua pasia mai e le matagaluega o le autalavou a le SISDAC Kuiniselani e faafoeina ma atonu e tele ni agaga e faamanuiaina ai.
O se tagata ua tau iai le faavaivai ina ua vaaia se tino lapo’a aua o le tele o tagata ua lusi kilo, ua maui tino ma suia lagona faanoanoa ile fiafia ona o le polokalame lava saunia a le FIKAFIT. E leai se faalogologo tigā ona e maua ai le agaga fefaamalosia’i, fefaasoa’ai ma fegalegalea’i tagata uma.
Sa saunoa le taitai o le autalavou e pei ona faatalanoaina ai, na faigofie lava ona faavasega upu e lua o loo i totonu o le “FIKAFIT” mate’ia le uiga. E ma’eu foi le tomai na fausia ai lenei igoa e fetaui lelei ma le polokalame ina ia faaseki pe fit le fika. Na saunoa le taitai autalavou o le Sisdac Matagaluega a Kuiniselani, le faletua ia Fiapa’ipa’i Pā’u’u, e faapea, “O la matou sini ina ia fausia pe faavae se faalapotopotogapoo poo se siosiomaga faale’aiga, faaleuo ina ia aotauina tagata.
O lo matou faanaunauga, ia faaosofia lagona o tagata e fai mea silisili ina ia avea ai latou o tagata fai mea mafai ile itu faalemafaufau, faaletino ma le faaleagaga. Matou te finau e aveese mea fita o punitia ai fesootaiga lelei i ai matou ma isi tagata ae ia fefaauoa’i ma faifaimea faatasi ma isi tagata” e ala i lenei polokalame.
E fa aso o le vaiaso o loo fai ai a matou faamalositino, taeao o Aso Sa, po o Aso Gafua, po o Aso Lua ma po o Aso Tofi. Ua iai i latou ua iai poto faapitoa ma agavaa i lea foi matātā o loo latou faagaioiina le polokalame ae taunuu ma faigofie mea uma e ala ile galulue faatasi.
E taliaina soo se tagata le taualoa, tagata matutua ma le autalavou, e fiafia foi i tagata ua agavaa i soo se taaloga aua ole latou mafuta mai e faaosofia ai lagona fiafia o lenei team. E iai avanoa e tuuina ile autalavou e fesuia’i ae faaailoa mai a latou taleni ma faasoa mai metotia faaonoaponei aua le manuia faapea tupu ma ola o lenei polokalame.
O lenei faamalositino ose misiona e faia fua mo so o se tasi e fia mafuta mai i le team ale FIKAFIT o loo faagasolo pea ile hall a le Ekalesia SISDAC i le maota tutotonu o le matagaluega a Kuiniselani.
Na faaailoa le agaga faafetai tele o le taitai autalavou le faletua ia Fiapa’ipa’i Pā’u’u ma i latou uma i taleni a nisi o tupulaga talavou o avea ma faia’oga o lenei polokalame.
O lagona faaosofia ma le faagae’etia o tagata uma e fia auai pea ona o le lava saunia o nei polokalame. Ua faa’oaina foi nisi e iai tomai ma le poto faapitoa e faia nei a’oga i taimi ma aso e pei ona faatulagaina. E molimauina pea le alualu i luma o le polokalame a le FIKAFIT ona e galulue faatasi uma tagata faapitoa ile autalavou aemaise nai matua, uo ma aiga. O le isi lea lu’itau mo i latou aua a leai se tiga, e le maua se mea ma se filemu, a le minoi e le mafai ona lusi kilo. (NO PAIN, NO GAIN)
