Ua toe taliu i o latou atunuu le aumalaga a tupulaga talavou (Mission Centre), e to‘a 23 i latou mai atunuu eseese o Asia ma Europa na auai mai Kalaiesetete mo le latou faamisiona, lea sa talimalo ai le afioga Patele Paulo Filoialii ma lana aulotu Palisi i Hornby.
Ua atoa le vaiaso talu ona iai le aumalaga ma sa asiasi atu i latou i le falemai o Princess Margaret ma nisi o aoga aemaise sosaiete o tupulaga talavou.
E oso luluga o mafuie e lua i Kalaiesetete o loo faagasolo a latou polokalame fuafuaina.
Na malaga mai i latou e faatino le latou foi pitolaau o faaevagelia ma pesepesega ma saga faalauiloa atili le faaolataga a Iesu Keriso i le soifua ma le olaga o le talavou a o tuputupu a‘e.
O nisi o a latou faaevagelia matagofie sa faatinoina i le sauniga lotu i le Aso Sa ua mavae i le ekalesia Katoliko i Hornby, taitaia e le afioga Patele Filoialii.
Sa faatumulia i uso palagi aemaise nai Samoa ma Toga o loo tapuai ai. O nisi o atunuu e malaga mai ai o Korea, Filipaina, Malaysia, Singapore, USA, Siamani, ae toatasi le sui Niu Sila. Ua iai ma le luitau ua tatau ona iai ma se sui o le Pasefika i totonu o lea foi misiona.
O le taliina o le aumalaga sa nafa pea ma nai aiga o le aulotu, ma faaalia foi e Patele Filoialii lona agaga faafetai e tusa ma le agalelei o aiga i le aumalaga e ui lava ina mafatia i puapuaga ma a’afiaga o le mafui‘e.
