E latalata i le luasefulu le aumalaga, o le autaaalo a alo ma fanau e lē atoatoa le malosi o le tino ma le mafaufau, e aofia ai ma tamaitai e toalua e nafa ma le vaaia o le soifua maloloina o le ‘au, faapea ofisa ma le taitai malaga, ua tuuvaa ese ma Niu Sila i le faaiuga o le vaiaso na tea nei. O le autaalo lenei o loo faitauina ai Samoa i taaloga a le Olimipeka o le a faia i le atunuu o Eleni i le masina nei lava.
E tusa ai ma se faamatalaga na faamaonia mai e se sui o le aumalaga, sa ta‘ua ai e faapea, o le taimi muamua lenei ua masii ai se autaalo ma faitauina ai Samoa i lea foi taamilosaga tele a le lalolagi, e faapitoa lava mo alo ma fanau e lē atoatoa le malosi o le tino ma le mafaufau.
O le Aso Faraile o le vaiaso lava na tea nei, na taunuu ai i Aukilani lea aumalaga ma le faamoemoe e toe tuuvaa ese ma agai loa i le atunuu e pei ona fuafuaina ai taaloga. O le ekalesia EFKS i Magele i Sasae, le susuga i le faafeagaiga Rev Victor Pouesi ma le faletua ia Salome, sa faatalia le taunuu ai o lea malaga i Aukilani.
O fesootaiga sa faia ina ua manaomia se fesoasoani mo nai aso e mālōlō ai le malaga i Niu Sila, na tāpā ai le susuga i le faafeagaiga ma le aulotu i Magele. Sa tali ma le fiafia, ma le talisapaia e le ekalesia ma le auauna a le Atua le manaoga, ona o le silasila alofa ma le fia fesoasoani i le faamoemoe o alo ma fanau.
E lē gata i lea, ae o se avanoa foi na maua ai sina taimi e toe faaleleia atili ai ma tapenaga a le ‘au e ala i koleniga sa faia.
E faapea se faamatalaga ina ua feiloai atu i le faletua o le faafeagaiga, Salome Pouesi, sa matuā lagona le fiafia ma le faafetai i le ekalesia ina ua feiloai ma lululima ma le aumalaga. Saunoa le faletua, e faigofie lava le aumalaga i le tulaga o le tausiga ma isi tulaga uma lava. Na pau le itu e tatau lava ona mataituina, o le galuega o le asiasia ma le vaaia lelei o le tulaga o le soifua maloloina, peitai o lea itu o loo matuā lelei ona faatinoina e fomai, ma i latou faapitoa mo manaoga o loo malaga faatasi mai ma le ‘au.
Sa faatinoina lava le ‘ava o le feiloaiga i le taunuu ai o le malaga, ma le faatali ai o le ekalesia ma le faafeagaiga.
O le mae‘a ai o le taumafataga ma le malu o le taeao o le Aso Faraile na taunuu ai, ona agai ai lea i le aoga a King’s College i Otahuhu mo le faia o sauniuniga ma koleniga i le malae o lea aoga.
O le afiafi o le Aso Faraile lava lea, na faia ai faafiafiaga faafeiloai a le autalavou a Magele lava, atoa ai ma aitema a le malaga mai Samoa.
A o le Aso Toonai na sosoo ai, sa mālōlō ma tapenapena ai le toe tuuvaa ese ma Aukilani ma le faamoemoe o le a malaga agai i le atunuu e pei ona fuafuaina. E lua vaiaso e faataunuuina ai taaloga, ma e toe foi mai i Aukilani, ma toe faamautu foi i le Puaseisei, a o lei toe foi i Samoa.
