Tatou te sapi ia tatou tu ma aganuu, o sau faasolo e te tiu ai ma faailoa atu ai i isi atunuu, o oe o le Samoa.
O le ala lea, na aofia ai le mamalu lasilasi i Sini, aemaise le tapuaiga a le aufaigaluega paia, e opogi le Sauniga Lotu Faafetai, mo lona Tutoatasi. O le Aso Sa ua tuanai aso 12 Iuni 2011, na faataunuuina ai i le nofoaga tutotonu a le Ekalesia Aso Fitu i Minto, lenei faamoemoe.
Na auai aloaia le afioga i le alii Palemia, Tuilaepa L Sailele Malielegaoi ma lana Masiofo Gilian Malielegaoi, le aumalaga mai Samoa – le Minisita o le Matagaluega o Tina & Tamaitai, Atina‘e o Nuu ma Afioaga ma Agafesootai, Tolofuaivalelei Leiataua Falemoe, le Minisita lagolago o le Matagaluega o Leoleo ma Falepuipui, Lafaitele Patrick Leiataua Lesā, le Faatonu o le nusipepa a le malo o le Savali, Tupuola Terry Tavita ma le Hai-Komesina o Samoa i Ausetalia, Lemalu Samau Tate Simi.
E lē faigofie sauniuniga na feagai ma le Fono Aoao a Samoa i Sini, ona o le taimi muamua lenei ua faatasi mai ai se Palemia i ni faamoemoe faapenei. Na alo atu le faufautua o le Fono, susuga i le faafeagaiga Rev Iakopo Leleimalefaga ma le Ekalesia Faapotopotoga Kerisiano i Canterbury i le faatinoina o le ‘ava o le feiloaiga.
O le alo lava o le faafeagaiga le tamaitai o Anita, na avea ma augafaapae, tautuina o le ‘ava e Seiuli Siitia Riordan, o le faasoasoaina na nafa ma Leafa Fetoai Auelua.
O le fofoga o le po, o Tagaloa Seiuli Faleao Autagavaia, taitaiina le sauniga e Bishop Leti Nati, Ekalesia a Iesu Keriso o le Au Paia o Aso e Gata ai, Uarota 2 Minto. Na tofusia Ekalesia ma o latou tofiga, i le faatinoina o le sauniga lotu faafetai.
O le taimi na sili ona mataina o le solo mamalu a le Ekalesia a Iesu Keriso o le Au Paia o Aso e Gata ai a Ingleburn, ma le tagavai, sosoo atu ma le tulai faaaloalo mo le sisiina a‘e o le tagavai o le faailoga o lo tatou saolotoga.
Na taliga fia logo le atunuu, poo ā ni mataupu poo le auga foi o le lauga a le Palemia. Ae e ui ina tele ni timaiga na saunoa i ai, e tasi lava le ata ua manino mai, atonu e lē o toe mamao, ae faatau e le malo se fanua e faamautu i ai se maota mo Samoa, o loo alaala ma papaaao i Sini. O se fiafiaga sili lea i le Fono Aoao, ona o lea ua talia e le Palemia la latou talosaga mo se nofoaga tutotonu o le atunuu i Ausetalia, aemaise o Sini e pito i toatele Samoa o loo aumau ai.
O le Komiti Faafoe – Faatamā Toeaina Faufautua: Rev Toese Peleti Toailoa; Faufautua: Rev Iakopo Leleimalefaga; Peresitene: Muagututia Vailolo Siutu; Sui Peresitene: Vaele Ilalio; Failautusi/Sooupu: Peti Siitia Moaga; Teutupe: Faumuina Vaselisa Parker; Sui Teutupe: Nifae Sita.
Ua taunuu upu, ia valuvalusia pea a‘a o le fau, e pei o le faatauanau a le Fono Aoao i le Palemia, e sau se aso, e tino mai ai, le ata o moemitiga ma le galue punouai o le komiti faafoe, auā Samoa mo a taeao.
