Talu mai le suiga o le alatele e feoai ai taavale a le atunuu, o lea ua sili atu i le 2000 taavale laupasese lava ia ua lesitala i le Pulega o Taavale Afi ma Felauaiga i le Eleele ua faamauina.
O se siitaga tele lea i le numera o taavaleafi o loo tautuaina le mamalu o pasese i Samoa. Ae e ese mai i lea numera ua manino foi e faitau afe isi taavale umia taitoatasi ua aumai mai i fafo.
Ua faaopoopo le numera o kamupani ua faatau atu taavale, ae o lea foi la ua amata ona vaaia mataupu i le Faamasinoga ua lotea ai nei i luma o le Faamasinoga. O le aso 9 o Tesema e lau ai le iuga o se iloiloga e lua aso o faatautaia i le Faamasinoga Maualuga i Apia.
O tuuaiga o le taufaasese ma le lē manino o le faatinoga o galuega ua tuuaia ai e le Afioga Maiava Peni o Utualii le kamupani taavale mai i Iapani o le Unique Motors. Talu mai lenei mataupu ua faatau ma pulea nei e le kamupani taavale mai i Fiti ma Iapani o le Sai Motors lea kamupani taavale.
O le Unique Motors o se tasi lea o kamupani taavale na muamua lava faamautu i Samoa i le tausaga na tea nei ina ua suia le itu o le auala e feoai ai taavale. Sa faamautu i Lotopa ma o se alii Initia e nofo i Iapani lea na faatamoea le faatauina o taavale i Samoa.
Na toe foi lava lea alii i le amataga o le tausaga ona o le ita tele i le mataupu lenei. O le lipoti o lea mataupu na maua ai o le tausaga na tea nei na faatau mai ai e le Afioga Maiava Peni, o se faipisinisi o pasi, ma o se tamalii ua tele tausaga o galuega faapailate i Samoa, ni pasi se lua mai i le Unique Motors.
Na maua e sili laititi atu i le $70,000 (tala Samoa) le tau o le pasi e tasi. Na ave pasi ma o le leaga ai o se totoga o se tasi o pasi na moomia ai le iloa o le ituaiga pasi ma le tausaga o le fausaga ina ia saili ai se vaega o le afi ua leaga.
O le sailiga la a le atalii o Maiava, o Tauiliili Alpha o lea vaega o le afi, na moomia ai se tasi e faa-Korea ina ia faamalamalama tusitusiga ia e i luga o le taavale. O le taimi na faatau mai ai pasi na ta‘ua ai e Tauiliili Alpha na fai atu ai le Unique Motors o le tausaga e 1998 le fausaga o pasi ia, ae sau le faaliliu upu ma iloa ai o le fausaga o le pasi o le 1995.
Na ave sa‘o loa e Maiava totoga nei na faatau mai ma faatonuina le Kamupani Taavale ina ia totogi e latou totoga moomia o le pasi ma amata ai loa feutagaiga ona ua manatu Maiava ua faavalea i latou e le Unique Motors.
O loo teena e le Unique Motors tuuaiga nei ma faapea mai o le fausaga o taavale o loo faataga ona aumai i Samoa o loo mulimulitai ai lava le Unique Motors.
O lana faaaliga, soo se taavale lava e lima tausaga e mafai ona aofia i lona fausaga aemaise i ona totoga ma o le eseesega o le 1995 i le 1998 o loo i totonu lava o le lima tausaga e pei ona ia ta‘ua.
Faaalia e le susuga Vala Enosa, na oo atu Tauiliii Alpha ma tau o totoga o le afi e pei ona ta‘ua ma na totogi i ai le $800 mo le isi totoga ae $1000 tala le isi pili.
Mae‘a lea ae oo atu ma le tusi a Maiava ma faatonuina ai loa le Kamupani o le a lē o i le Faamasinoga ma lenei mataupu, ae e tatau ona toe avatu e le Kamupani ni pasi fou se lua atoa ai ma le $500,000 tala Samoa. O le isi tuutuuga o le avatu o ni pasi fou se lua, o se pikiapu se tasi ma le $300,000 tala Samoa.
Na oo atu loa le tusi lea toe tali mai loa le Unique Motors ma faapea mai, e toe faafoi mai pasi ua avatu ma o le a toe totogi atoa e le Kamupani le tau o pasi e lua na faatau i le tai $70,000 tala. E lei talia e Maiava Peni lea tali ma na ia ta‘ua i le vaiaso na tea nei, o loo feoai lava pasi ma o le mafuaaga lea o le ave o lea mataupu i le Faamasinoga.
Faaalia e Vala Enosa o le mafuaaga tele lava lea o le faia o le faaiuga a le alii Initia lea na faatautaia le Unique Motors e toe foi i Iapani ae faatau ana taavale. Na fesiliga Vala Enosa pe o le faiga lava lea o loo iai nei taavale faatau mai, o le ave sese o le tausaga o fausaga o nei taavale ae o lana faamatalaga e leai.
Na talosaga loia e lua pe mafai ona taatia le faasalalauga o lenei mataupu seia lau le iuga ae na faaali i ai o lea ua i luma o le Faamasinoga ma ua avea ma mataupu lautele. Ona pau le tulaga na moomia o a la faamatalaga e faatatau i le mataupu. Faaalia e le tamaitai o Tanya Toleafoa o loo tulai mo Maiava Peni, e leiloa poo le ā le faatonuga lea ua laga e Vala Enosa e faatatau i ni pasi fou ma ni tinoitupe faapea, ae na mafai ona momoli mai e le loia a le Unique Motors le kopi o le tusi e pei ona ta‘ua mo faamaoniga o faamatalaga a Vala Enosa.
O lea la ua tālia nei finauga na faia i luma o le Faamasinoga mo se faaiuga i lenei mataupu i le aso 9 o Tesema.
