O popolega o le Pule Sili o le kamupani vaalele o le Polenisia i le lē toe maua o ni galuega a le silia i le 70 o ana tagata galulue o loo feagai ma galuega o le lauina ma le teuina o uta a vaalele i Faleolo, ua faamuta ina ua faaalia e le Palemia, susuga Tuilaepa L Sailele Malielegaoi, e faaauau lava le tautua a i latou o galulue ai nei i le pulega a le Polenisia. Faaalia e le Palemia e suia i latou o le a tauaveina lea auaunaga tāua ae e tumau lava tagata faigaluega.
Ua faamaonia nei le faalēaogāina o le Konekarate a le Polenisia na ia faia ai ia galuega uma i le malae vaalele, ina ua manumalo le ofo a se kamupani Ausetalia o le a fai paaga ma le Pulega o Malae Vaalele le Samoa Airport Authority.
Faaalia e le taitai o le Malo, o le pulega o malae vaalele o se isi foi itutino o le Malo, ma e lē tatau ai ona iai ni atugaluga i avanoa faigaluega o le toatele o i latou o galulue i le Polenisia mo galuega i le malae vaalele.
E pei ona iai i nisi lipoti o loo ta‘ua ai, o le mafuaaga o le suia o le pulega o galuega i le malae vaalele e patino lava lea i uta ma pasese, ona o popolega o le Pacific Blue o loo pulea malaga a le Polynesina Blue i le saogalemu o ana pasese ma uta, ma tuuaia ai le auaunaga a le Polenisia.
Peitai o se tuuaiga o loo tetee pea i ai le pulega o le kamupani vaalele ona o le tele o tausaga o faia e le Polenisia lea tautua mo isi kamupani vaalele e pei o Air New Zealand, ma le Air Pacific, e aofia ai ma kamupani vaalele mai Amerika Samoa o loo tautuaina le va o Samoa e lua.
E lei faailoaina mai se aso o le a faamuta aloaia ai le auaunaga a le Polenisia i galuega i le malae vaalele i Faleolo. O loo iai le talitonuga o le tausaga fou 2011 o le a faato‘ā faatino ai lea suiga.
O le kamupani vaalele o le PolyBlue o loo umia e le Malo o Samoa le 49 pasene ma e iai le talitonuga o se tasi lea o sao lelei o le Malo o le suia o se isi auaunaga e faia ia galuega.
O le fono a le Kapeneta talu ai nei na faaiugafonoina ai le suiga fou ma aloaia ai foi le faamutaina o le tautua a le Polenisia i le faia o ia galuega.
E lata i le 80 le aufaigaluega o loo galulue i le vaaia o uta ma faamomoli faapea le saogalemu o pasese ma vaalele pe a taunuu i Faleolo.
