“E na’o le lua lava tulafono na fesili mai ai le Ao ole Malo”
E na’o le lua lava tulafono na fesiligia ai le Palemia ele afioga ile Tui Atua Tupua Tamasese Efi ao avea ma Ao ole Malo ile sefulu tausaga sa seei ai o ia ile tofiga taualoa ma maualuga ole atunuu.
Ole finagalo lea ole Palemia susuga Tuilaepa Lupesoliai Sailele Malielegaoi, e faamalamalama ai le folasaga a Tupua na faia ise faatasiga i Niu Sila talu ai nei, lea sa ia ta’ua ai i lana folasaga na ilitata e saini le tulafono ole lesitalaina o fanua ole tausaga e 2008.
Na saunoa le Palemia i feiloaiga ma tusitala ma le aufaasalalau ile vaiaso ua mavae ma ia faaalia e na’o le tulafono e tapu ai ona toe feoa’i faipule ole Palemene mai le isi vaega faaupufai ile isi pati, ma le tulafono o taaloga faitupe i fale kasino. O lona uiga e lei fesiligia ele Tui Atua le Palemia ma le Kapeneta ile tulafono ole lesitalaina o fanua lea oloo vevesi ai finagalo o nisi ole atunuu.
Na faaalia e Tuilaepa na fesiligia o ia ele Ao ole Malo i lea taimi ile tulafono ua tapu ai ona toe feoa’i faipule ole Palemene ona ole finagalo o Tupua pe aisea e inaina ai le Malo ile itu agai e toaititi faipule o iai. “Na ou fai isi alii vaai, e lē o le Itu Agai lea e fai iai le tulafono ae ole maopoopoga ole Malo ma ia avea ai Samoa ma atunuu e lē vevesi ona upufai o Malo”.
Na faamatala e Tuilaepa tausaga ua alu ma mea na tutupu ai lea na toilalo ai le faigamalo a Tofilau Eti Alesana ina ua o ese faipule e toa sefulu tasi ole HRPP lea na latou fau se faigamalo soofaatasi ma Tupua ma faipule ole itu agai i lea vaitaimi.
“E le tatau ona toe tutupu mai ni mea faapea”. Ole fesiligia e Tupua ole Palemia ile tulafono o kasino na faamatala Tuilaepa na mafua ina ua maea ona saini le Ao ole Malo ua talia le tulafono ae toe fesootai atu ile Palemia ma faailoa iai nate lei silafia le tulafono ua uma ona ia sainia.
Faaalia e Tuilaepa na iai se manao ole Ao ole Malo e taofi le tulafono. Na mafua lea manaoga ina ua faasalalau e se nusipepa le saini e Tupua ole tulafono o kasino a’o avea ma Ao ole Malo.
“Na mafua ona le silafia ele alii le tulafono ona o lana failautusi ua la’u uma atu tulafono ma saini ae e lei faitau ai le failautusi poo a ia tulafono. “O lona uiga e lei faitau ai foi le Ao ole Malo poo a ia tulafono ae na’o na avatu lava saini”.
Faaalia ele Palemia ole saini poo le lē sainia ese Ao ole Malo ose tulafono e pasi ele Palemene ose tulaga e lē talafeagai. “E faapefea ise tagata e toatasi ona ia taofi ma teena se tulafono ua ioe iai le Palemene ole finagalo atoa lea ole atunuu”.
“E na’o le fitu lava aso e tuu ele Kapeneta ise Ao ole Malo e filifili ai ile saini ma le lē sainia ose tulafono pe afai ua iai ise tulaga teena se tulafono, e uma loa le fitu aso lea ae lē sainia e faia lava le faaiuga ale Kapeneta ae faagasolo loa se tulafono”.
E manino ile faamalamalamaga ale Palemia pe saini le aao ole Ao ole Malo pe leai, e malosi le aiaiga ole tulafono faavae ile malosiaga ole Kapeneta e faatino ai faai’uga fai ole Malo.
Ua faamanino foi e Tuilaepa ole tofiga Ao ole Malo ose tofiga ua ave uma iai mamalu maualuluga ole atunuu ma le Malo. “E iai lava le avanoa e aumai ai lana tuualalo ile Malo ona silasila lea ma liuliu iai se finagalo ole Kapeneta”.
