O le mafuaaga maualuga lava i le Teuteuga o le Faavae o le Malo Tutoatasi o Samoa o loo pisa ai nei o le maua lea o se avanoa e tuuina atu ai i le faamasinoga tonu le mataupu a i latou o loo faia’ina mai a latou apili i le Faamasinoga o Fanua ma Suafa.
O le saunoaga tusitusia lea a lē sa avea talu ai nei ma Loia Sili o le malo o Samoa le Afioga ia Lemalu Herman Retzlaff.
Fai mai Lemalu ma lona malamalamaaga i le mataupu lea ua pasia lona faitauga faalua i le Palemene ma ua tuuina atu i le Komiti Faapalemene latou te lauiliu ma talo le atunuu o ē o loo fia faaali o latou finagalo e tusa ai o ia tulafono.
“E tusa ai ma faiga faavae o loo iai nei, e mae’a loa ona tuuina mai le iuga a le Peresetene a le Faamasinoga o Fanua ma Suafa i se faamasinoga apili, e lē o toe iai se isi faamasinoga e mafai ona sulufai i ai le aiga e lē manuia, mo se apili poo se toe iloiloina o le iuga ua tuuina mai.”
O loo ia faapea mai foi, na pau lava le laveai o aiga o loo faailoa lo latou lē fiafia i se faaiuga mai le Faamasioga o Fanua ma Suafa i le taimi nei, o le tuuina atu lea o se talosaga i le Faamasinoga Maualuga (Supreme Court).
O le faamasinoga o Toe iloiloga (Judicial Review) e gafa lea ma le sailia o le moni ma le faamaoni o le tulaga na faatino ai le Faamasinoga, i se mataupu a’o suesue ai i lalo i le Faamasinoga o Fanua ma Suafa. E lē o iai se malosiaga i lea faamasinoga latou te tagofia ai pe iloilo ni feteenaiga poo ni soalaupulega faaleaganuu, e pei o le toe talanoaina o gafa, ma talatusia. O lona uiga o le faaiuga lava e tuuina mai e le Peresitene o le Faamasinoga o Fanua ma Suafa e lē mafai lava ona toe apili i se isi lava faamasinoga o se faaiuga ua tumau.
O lea tulaga ua manatu ai le malo ua alagatatau ai ona faatu se isi Faamasinoga fou mo Apili. E manatu le malo e ala i le teuteuga lenei, e mafai ma tatau ona tuuina atu i aao o le Faamasinoga Apili lea o loo mulimulitai i tulafono ma faiga faavae Faaperetania i le taimi nei, ona tauaveina le auiliiliina o la tatou aganuu, poo le fesiligia faaletulafono o le Faasamoa mo Samoa lava ia.
“O le alafua manaomia o le faavaeina lea o se Faamasinoga Faasamoa e gafataulimaina faaiuga faaleaganuu faasamoa moni.”
Ua faailoa manino e Lemalu e leai lava se faamoemoe o nei tulafono taufaaofi e lote ai fua aiātatau o tagata taitasi e pei ona faataatia mai e le Faavae. E oo lava i fanua faaleaganuu ma lona puipuiga o le a lē lotea pe solia foi e nei teuteuga….” E aunoa lava ma se vaega i nei teuteuga o loo mafai ai ona faaliliu ai se fanua faaleaganuu i se fanua umia saoloto”. E lē o iai foi se aiātatau i lenei faamasinoga o faamoemoe e faatino ai fua ni faaiuga i luga o ni fanua o ni aiga e aunoa ma ni talosaga e faauluina mai e ni aiga e manatu e fia saili se fesoasoani mai le faamasinoga.
Ua faailoa o le manatu lava ia o le Malo ia faavae se faamasinoga fou na te gafataulimaina nei faafitauli o loo alia’e mai pea, ina ia maua e aiga le avanoa tutusa e maua ai se isi faamasinoga maualuga atu e saili i ai le moni ma le sa’o i le autalaina o mataupu e faatatau i fanua ma suafa matai.
“O itu mafatia nei ua fai ma masani, i tausaga e tele ua mavae, ona sulufai atu i le Ofisa o le Alii Palemia, Minisita, ma isi sui mamalu o le Malo mo se fesoasoani, ma sailia poo ai e gafataulimaina sa latou talosaga mo se isi apili?
Ua faailoa foi na afua mai lava nei toe fuataina i le Komisi Suesue Faapalemene o le 2017-2018 sa latou iloiloina le faatinoga a le Faamasinoga o Fanua ma Suafa. O loo faailoa foi sa valaauina itutino uma o le malo atoa ai ma tagata lautele ma o loo faapea mai sa toatele i latou na faaali o latou manatu ma finagalo. O lea ua toe o se aga ona amata lea o le faaaliga o finagalo o le atunuu e tusa ai ma le manaoga o nei tulafono, a’o agai atu i lona pasiaina, ina ia faalauiloa mo le silafia ma le tuuina mai foi o finagalo o le atunuu e tusa ai o tu ma aga o malo faatemokalasi.
Ua faailoa e Lemalu e iai lava foi i lea komiti le malosiaga latou te faia ai teuteuga e manatu e alagatatau i le Tulafono Taufaaofi mo le faamaonia maia e le Palemene.
Ua faailoa e lē sa avea ma Loia Sili o le Malo o Samoa talu ai nei, o lona tulai ai i luma o lenei komiti ua ia maitauina ai le maualuga o le galulue a ia tamalii o le atunuu i le aoaoina faamaoni o iloiloga ma manatu faaalia o le atunuu lautele ma le lē faaitu’au. Ua faailoa nei e le failautusi o le maota ia Tiatia Graeme ua avanoa nei le komiti mo folasaga a le atunuu i le mae’a ai o le tauaofiaga a le Palemene o loo sosoo ai nei.
