Aufaigaluega a le Ofisa oTokelau ma nisi o Tama ma Tina matutua i Mapuifagalele

E lei atoa se vaiaso na faasalalau ai i luga o le Polokalame a le Good Morning Samoa a le TV1 Samoa i le vaiaso na te’a nei, le manaomia ai o se fesoasoani mo le aai o tamā ma tina matutua i Mapuifagalele ona ua utiuti le faasoa i le tele o vaega mo le tausiga o lea nofoaga, ae molimauina loa le sasaa ane o le alofa foai o le atunuu e ala i meaai, vaiinu, o pampers ma le tele o meaalofa na tuuina atu mo Mapuifagalele.

E oo lava i le Ao Mamalu o le Malo Tutoatasi o Samoa, le Afioga ia Tuimalealiifano Vaaleto’a Sualauvi II ma le Masiofo, o le ta’ita’i o le atunuu le Afioga i le Alii Palemia ia Tuilaepa Dr Sailele Malielegaoi ma lona aiga, o Minisita o le Kapeneta, o Faalapotopotoga eseese i le atunuu, o Ekalesia, o Faletupe (Banks), o Matagaluega a le Malo ma le tele o aiga taitasi na mafai ona tauaaoina le tele o nei foai mo Mapuifagalele. 

Saunoa le tamaitai Pule o le aai ia Sister Alosia, o se taimi muamua lenei ua tupu ai se vaaiga faapenei i le aai o Mapuifagalele i le toatele o le mamalu o Samoa ua lolofi atu e tuuina atu le tele o meaalofa mo le tausiga o nai tamā ma tina matutua, ua tutumu uma pusa aisa, o fata e teu ai oloa ua matuā faatumulia uma i le tele o foai a le mamalu o le atunuu. Na molimauina foi le tele o nisi o foai na faameaalofa mai e aiga Samoa mai atunuu e mamao aemaise lava o Niu Sila ma Ausetalia. 

O nisi o foai e aofia ai pepa tala oloa na faatau sa’o mai luga o le internet e faaaogāina ai le auaunaga a le Talofa Voucher ae piki ai i faleoloa i Samoa. 

O le ofisa o Tokelau i totonu o Samoa na foai ai foi le siaki tupe e $1,000 faapea foi nisi o meaai taumafa, faapea foi le faalapotopotoga o le Helping Hand i Samoa na tuuina atu se siaki tupe e $5,000 faatasi ai ma le tele o meaalofa mo Mapuifagalele.

Ta’ua e Sister Alosia, e lē gata ina foai atu e le atunuu le tele o meaai ma vaiinu ae faapea foi i le itu tau seleni. E oo mai i le taimi na tuufaatasia ai le tatou lipoti ua oo atu i le $80,000 le aofaiga atoa o le tupe na mafai ona alolofa atu ai le atunuu i totonu o le vaiaso e tasi. E iai le talitonuga o Sister Alosia, e lē o gata le alofa tulai o Samoa ona e toatele foi nisi o aiga o loo valaau atu i le telefoni ma faailoa atu a latou foai lea e agai taavale a le aufaigaluega a Mapuifagalele e piki mai nei foai. 

Saunoa Sister Maureen o se tasi o Tamaitai Taupousa mai Aferika i Saute o loo galue ai i le aai o Mapuifagalele, ina ua amata ona pepesi le faama’i o le Koviti-19 i le amataga o le tausaga lenei, faatasi ai ma le faamamalu ai o poloaiga a le Malo i le faasā ona toe feoai ai tagata i nofoaga faitele, o i tonu lea na molimauina ai le pa’ū maualalo o nisi o foai sa masani ona tuuina atu i le aai, o le mafuaaga tonu lea na talosagaina ai loa se fesoasoani a le lautele o Samoa. 

O le aai lenei o Mapuifagalele e faalagolago lava le tausiga o tamā ma tina matutua i luga o aisiga e faatino lea e Tamaitai Sa, aemaise foi o i latou o galulue ai. Talu mai lona faavae mai, e leai lava se vaegatupe faapitoa o faamoemoe i ai ona sa faavae mai lava i luga o aisiga.