E lē fesootai le mu o le ofisa o le Regulator ma suesuega o faia i le Pule Faatonu

Ofisa i le Pule Faatonu

Ua fai si umi o tālia se faaiuga mai le Komisi e pulea tagata faigaluega a le Malo le PSC e faatatau i le mataupu e pei ona faamālōlō lē tumau ai le tamaitai Pule Sili o le Ofisa o le Pule Faatonuu poo le Regulator, le susuga ia Lefaoalii Unutoa Auelua-Fonoti.

O le masina o Fepuari o le tausaga lenei na faamālōlō lē tumau ai lea Ofisa Sili ae tuu le avanoa e faagasolo ai suesuega a le Komisi e pulea tagata faigaluega a le Malo. O lenei mataupu na mafua ona alia’e mai ina ua tuuina atu se tusi a se tasi o tamaitai e faigaluega faafailautusi i le Ofisa o le Pule Faatonu i le Komisi o tagata Faigaluega a le Malo e faatatau lea i le faatinoina o galuega a le Ofisa Sili. 

Na ta’ua i lea tusi le faaaogāina ai e le Pule Faatonu o tagata faigaluega o le ofisa mo ana feau faaleaiga i taimi o galuega a le Malo. 

O nisi o mataupu o loo ta’ua foi i le tusi lenei a le failautusi, o se tasi o malaga a le tamaitai Pule na alu i Amerika, ae ina ua foi mai i lea malaga sa ia valaau ai i lana failautusi ina ia agai e faatau sona ofuvae laititi (panty). O loo lomia foi i lenei tusi le faaaogā sese ai e le tamaitai Pule o tupe a le ofisa e faatau ai ana sikaleti, faatau ai pia mo inuga pia, faatasi ai ma le faatauina o supo a Leilani o se uo a le Pule Faatonu ae momoli i le ofisa o Leilani. 

Afamasaga Lepuiai Rico Tupai – Minisita o Fesootaiga, Faasalalauga ma Auala Faatekenolosi

O le kopi o lenei tusi na tuuina atu i le Alii Palemia. Ae i le saunoaga a le Minisita o Fesootaiga ma Auala Faa-Tekonolosi, le Afioga ia Afamasaga Lepuiai Rico Tupa’i i le vaiaso na te’a nei, na ia saunoa manino ai e leai se fesootaiga o le suesuega o faia nei i le faamālōlō lē tumau ai o le Pule Faatonu, ma le mataupu e pei ona mu ai le ofisa o le Pule Faatonu talu ai nei.

Saunoa Afamasaga, o le suesuega o le mataupu e pei ona faamālōlō ai Unutoa, o loo gafa lea ma le Komisi e Pulea Tagata Faigaluega a le Malo le PSC, o loo iai foi vaega o loo feutaga’i ai lea Komisi ma le Loia a le Pule Faatonu, ma e tatau ona maua mai se faaiuga o lea mataupu i le masina fou.

Ae i le mataupu e pei ona faaumatia ai le Ofisa o le Pule Faatonu i le afi talu ai, o loo gafa lea ma le Ofisa o Leoleo, Tineimu ma le Kamupani Inisiua. O loo tālia foi e le Kapeneta lea suesuega i le mafuaaga tonu na tulai mai ai lea faalavelave. O le saunoaga manino lea a le Minisita. Ta’ua e Afamasaga, e leai se fesootaiga o ia mataupu e lua, ma o loo faatali foi i le taimi e mae’a uma ai suesuega o nei mataupu e lua. 

Ua mafua foi ona faamanino mai e le Minisita ia mataupu e lua ona ua iai foi masalosaloga o nisi o le atunuu i le tulai mai ai o lenei mu tele i le Ofisa lenei o le Malo, a’o faatali ai se faaiuga i le mataupu o loo faamālōlō lē tumau ai nei le Pule Faatonu o lea Ofisa. O faiga faavae lava a le Malo o Samoa mo soo se tagata faigaluega a le Malo e tulai mai ai ni faaseā poo le masalomia foi o le faatinoina o ona tiute, e faamālōlō lē tumau, ae faagasolo suesuega pe faamaonia ia tuua’iga pe leai.

Afai ae faamaonia ni tuua’iga e mautinoa lava le tuuina iai o se avanoa ina ia faamavae mai ai i lana galuega poo le faamalosia loa ona faamatua lana galuega, ae afai e mae’a ane suesuega e lē faamaonia ni tuua’iga, ona toe maua lea o le avanoa e faaauau ai ana galuega i le Malo.