O le afiafi o le Aso Tofi na maua ai faamatalaga mai se uo faamoemoeina a la tatou nusipepa e faapea o loo vevesi lo latou nuu i Faleatiu ona o se mini van Noah lanu efuefu, o loo aveina e lē sa sailia e leoleo le alii o Iolamo Mo’a ma isi, ma o loo faapāpā le laau malosi i luga o le auala, agai i Matai ma Tupulaga o le afioaga o Faleatiu.

“O le alii lea ua atoa le tolu vaiaso o fai lana amio e amata mai lava i uta o lo matou nuu o le faaiuga o le vaiaso na mavae nei lea na oo mai ai i gauta atu ii, ma faafefe si ulugalii lea i gauta atu o matou. Ua matou fiu e vili leoleo o le ofisa i Faleolo, ae lei omai lava.”

O le auala galue i le afioaga o Faleatiu lea e faamatala mai e si uso lea, o le auala lea e masani ona faaaogā e leoleo i soo se osofaiga lava i toga laau mariuana a le alii o Filipaina Faisauvale i taimi ua te’a ma o loo faaaogā pea i le taimi nei.

O le faamatalaga e faapea o le Aso Tofi lava lea sa fono ai le afioaga o Faleatiu, i le pule a alii ma faipule, ma talanoaina ai le agai atu o ni matai i le Alii Komesina o Leoleo ia Su’a Fuiavailili Egon Keil e logo i ai le faafitauli o loo tupu.

“Ai na logotala loa i ai le alii lea o Iolamo o lea ua o lo matou nuu i le Komesina, omai ai loa fai le tulaga lea o le faapāpā o fana ina ua poloka e le nuu le auala agai i uta, e iai lo matou talitonuga o lea e iai faatasi ma le aualii ia e sue nei e leoleo.”

O Iolamo ma Sosene ua atoa ai i le taimi lea, le 3 vaiaso o sailia e leoleo ona o le la gaioiga na faia i leoleo sa o atu i ai mo se mataupu i lo latou aiga i Fasitootai, o le faamatalaga a le alii Komesina i le autusitala e faapea sa faamata’u e lea aualii leoleo na o atu, ma tafana lalo o vae. 

Na logotala le ofisa o leoleo faapea ai foi le vaega faapitoa mo faalavelave faapea e tauaveina aupega malosi le Tactical Operation Section (TOS) ma agai mai ai loa le tiute i lea lava afiafi. E oo mai leoleo ua uma le gaioiga lea sa faia, ua ta’ape le afioaga sa feei fafine ma tamaiti faapea tupulaga i le fefefe, a’o faapāpāeeee fana le alii ua molia nei e leoleo.

O le afiafi lava lea na toe tapena lelei ai loa lea vaega ma agai mai ai loa i Faleatiu ma Fasitootai i le vaveao o le Aso Faraile o le vaiaso ua mavae. Sa faia tuliga a leoleo ma le aualii ia o Sosene Asomaliu ma Iolamo Mo’a amata atu i gauta o Fasitootai seia oo i Faleatiu. E lei leva lava ae maua loa Iolamo ae sola pea Sosene, ma na maua faatasi lava Iolamo, ma le isi alii sa molia mai i le tele o aupega umia le faatulafonoina i totonu o Samoa atoa ai ma le osofaiga a leoleo tele lava lea na alu i Faleatiu i le 4 toga mariuana i nai masina ua mavae atu le alii o Fotu Mo’a. 

Sa faailoa e le Alii Komesina o Leoleo, na agai lava la latou osofaiga e saili mai Iolamo ma Sosene, peitai, na maua atu ai ma Fotu lea ua faitau masina talu ona tatala i tua ae lei toe oo atu i le ofisa e saini e tusa ai ma aiaiga o le tatala ai i tua o lea alii.

Ua i lima nei o leoleo Iolamo ma Fotu ae o le Aso Faraile lava lea i le po na logoina ai e nisi o le afioaga o Fasitootai leoleo o lea ua latou maua Sosene le isi alii sa sailia. E ofo le alii komesina ma le matagaluega i mea sa maua mai i le osofaiga, e pei o aupega malolosi (fana) e le faatagaina i Samoa, o tupe mai le atunuu o Iraq, o telefoni, o le tusi faatatau i aupega malosi (fana) atoa ai ma nisi o vaega o loo faapea mai le Alii Komesina e gaosi ai le fualaau faasāina o le cocaine.

“O lea ua maua mai foi nisi o vaega i lo matou iloa ma le vaai o ni vailaau e fausia ai le fualaau faasāina o le cocaine, o le ā le mea a lenei fualaau e fai i Samoa nei, e fou lenei tulaga. O lea foi ua oo mai nei ituaiga fana faapea, e o sikaki faga ae lē faikau le Tusi Paia, aemaise le taimi lenei o lea e fai le tatou SOE.”

O loo faapea mai foi le Alii Komesina, a faapea la o mea nei lea o loo maua atu i osofaiga nei a leoleo, o a la nisi mea o i tua e lē o maua atu i le taimi lenei, o se popolega lea i le matagaluega. Na ta’ua foi e le alii Komesina, o loo tau fuafua e le matagaluega poo le ā le fesootaiga mai i Samoa o tupe Iraq lea na maua mai. “E tofu lava le aulaii ma tupe, o tupe e oo atu i le $25,000 Dina Iraq tusa lea ma le $20USD, ma o le a tagai i ai leoleo, aemaise ai o le fesoasoani mai a le ofisa o Soligatulafono Faavaomalo le Transnational Crime Coodination Center lea e iinei ma e silia i le 21 atunuu o loo aofia ai. 

O loo iai foi le avanoa e mafai ai ona talosaga atu i Malo Aufaatasi (UN) i fesoasoani mo le tau faafesootai o vaega nei, o a’upega e lei vaaia muamua i Samoa, o vaega e gaosi ai fualaau faasāina, atoa ai ma tupe mai Sasae Tutotonu lea ua maua i lo tatou atunuu.”

Na fesiligia foi le Alii Komesina e tusa ai o le alii o Fotu Mo’a lea sa tatala i tua e le faamasinoga e tālia ai le aso e toe tulai ai i moliaga sa molia mai ai i le osofaiga a leoleo i lo latou aiga i Faleatiu lava, peitai ua lē utagia tuutuuga o le tatala ai i tua. O le ā se vaaiga a le matagaluega i le fesootaiga lea i le va o leoleo ma le Faamasinoga i lea tulaga.

Na saunoa Su’a Fuiavailili Egon Keil, “O loo faia le galuega a le Faamasinoga e pei foi o leoleo ma i tatou uma, ae manaia pe a toe tagai lelei i ai le faamasinoga i lea tulaga, auā a tatala nei i tua ae o atu toe solitulafono mai, aemaise lava i soligatulafono matuia ma e ono lamatia ai le soifua o le mamalu o le atunuu, ou te iloa pei a sa lē tatau lava ona tatalaina i tua ia tagata. Ou te lē o fai atu, faapea, ua tuu i lalo le galuega a le Faamasinoga ma le faagasologa o loo iai, ae afai o loo lamatia ai le ola o leoleo ma le atunuu, lona uiga e pei lava sa lē tatau ona tatala i tua, aemaise lava i tagata faapenei e iai le talaaga o latou olaga solitulafono.”

Sa faailoa foi e le Alii Komesina e lē o manaomia lava se tasi e ma’umau le soifua i osofaiga nei, ma afai e lē o se tulaga lea e manaomia e tatau lava ona taofia pea i latou nei i le vaaiga a leoleo.

“E lē manaia foi i nai leoleo le lamataia o lo latou soifua, e pue mai le alii lea o Fotu, o loo iai ana solitulafono e tele muamua, ae tatala atu toe fai foi, ma atili lamatia ai le ola o leoleo, e o atu e taumafai e pue mai le alii lea. E ao ona ou fai atu e lē faigofie le taumafai e pue mai tagata ia, e lē o se tulaga lea ou te fiafia a’u ia e fai, o le o i Faleatiu e taumafai e pue mai ni tagata e iai ni fana, o se tulaga lē sefe mo leoleo ma lamatia.”