O Fred Te‘o o lona suafa lea sa lauiloa ai i lana galuega o se tagata faasalalau i luga o le uluai leitio FM na muamua faatuina i Samoa i le vaitau o le 1990.
O lona leo paū ma le oolo sa fiafia i ai le tupulaga talavou i le atunuu pe a tiute i le alaleo o le 98.1 na amata ai faasalalauga a le Radio Polynesia sa faaaogā lua ai le gagana Samoa ma le gagana faaperetania.
“O se galuega lea na ou galue ai sa sili ona ou fiafia e faatino auā o le taimi o le talavou o le olaga ma sa leai foi se aiga na faia auā o nai o‘u mātua lava sa fai ma taiala i fautuaga mo a‘u ma isi o‘u uso ma tuafāfine”.
O le faamatalaga lea a le susuga Fred e iloa foi i lona suafa o Vainiu ae ua ia umia nei le suafa matai o Tali‘ulu.
O ia o se tasi o alo e faasino i le Afioga Taito Galu Te‘o, sa amata lona olaga faipisinisi i se fale e faafuga ai ao poo le fale ‘otiulu sa lauiloa i tausaga e tele ua tuanai.
Na faamatala Fred poo Vainiu Te‘o, e ui i sona naunau e ati a‘e lona tomai o se tagata faasalalau i luga o leitio, peitai o le tele o taimi e alu lona mafaufau i le faiga o pisinisi pe a vaai i le naunau o lona tamā ia lelei uma i latou i le faipisinisi, auā e lē na o le aoga e maua ai se lumanai.
O le mafuaaga lea o lo‘u taumafai pea e faatino nisi o galuega sa maua ai nai seleni sa faaputuputu ma oo ai ina ausia lenei tulaga fou ua faia i le atina‘e o pisinisi.
O le nofoaga sa avea ma ofisa tutotonu o le vaega faaupufai o le SNDP lea na suia le igoa i le SDUP ua faatū ai nei le pisinisi a lea tamalii talavou o le atunuu.
O se auaunaga ua mafai ona lolomi ai ata ma mamanu eseese faapea ma igoa i mitiafu, ma ie lavalava. “O la‘u malaga i Niu Sila ma lo matou aiga (toalua ma le fanau) na ou vaai ai i se tasi o lo‘u aiga o faia le pisinisi lea, ma na avea ma luitau ia te au ona ou te fia faia auā e lelei tele i Samoa”.
O le igoa o le pisinisi o le MATNIUEL Screen Printing and Signs i Sogi o loo sosoo ma le faletalimalo o le Elisa Hotel i le pito i tua.
Sa ia faamatala ma faailoa e tusa ma le selau afe se seleni na ia faatau mai ai masini ma isi totoga auā le faatinoina o lana pisinisi. “E leai se mea e lē mafai pe a iai le loto atoa, ma ou te faafetai ai i si o‘u toalua”.
O Tali‘ulu Vainiu Fred Te‘o, ua faaipoipo i se tasi o alo tamaitai o se isi o tamalii o le atunuu ua lausilafia i upufai poo polokiki ae o se faipisinisi foi, Afioga Le Mamea Ropati Mualia. Ua mafai e lea tautua ona saunia laei ma togiga mo ni faatasiga tetele a aiga poo family reunion e pei ona saunoa le alii pule. E mafai foi ona latou tusia banners poo fu‘a.
O loo taulai lenei auaunaga fou i le atunuu faapei o isi pisinisi faapea na muamua faatino i Samoa, i le fesoasoani i le atunuu i ni tau talafeagai mo galuega e manaomia ai le latou auaunaga. E faia le talanoaga a le tusitala ma le alii pule, ae o loo pisi le aufaigaluega i le lolomiina o mitiafu o le togiga a le Blue Sky Samoa Tel.
“E mafai ona matou fetuutuunai le totogi ma avatu i se tau talafeagai ni galuega e manaomia mai ia matou aemaise lava faatasiga a aiga, o togiga a autalavou ma ekalesia poo komiti a tina faapea faalapotopotoga e manaomia ia vaega i ni mafutaga tuufaatasi.
