Ua tele matata ma taleni e tuuina e le Atua i le tagata, e pei foi o taleni ua lauiloa i le Tusi Paia, na toe galueaina taleni e 5 ma maua ai le isi 5 faapena le 3 ma le 2, ae o le tasi e ui ina na o le tasi ae na tanu lava e lei iai se faasiliga.
E ‘oa foi ma tamaoaiga tamafanau a Samoa e ala i le saili malo, e lē gata i taaloga ae sili foi i a‘oa‘oga ma atili faamanuiaina ai lava i galuega lelei ona o le finafinau atili.
O loo iai se galuega mae‘ae‘a ma le fesoasoani o loo faagasolo ai pea semina faapitoa o loo galulue vaavaalua ai le mafutaga a le Leo o Tagata Samoa i totonu o Brisbane ma se tasi o Iunivesite.
O se tasi semina lata mai na usuia i le po o le Aso Lua 19 o Aperila, ma o le polokalame ua igoa o le Global University of Lifelong Learning (GULL) poo le Iunivesite Faa-va-malo.
O le faamoemoe ma le faanaunauga o nei semina, ina ia faapupula atu i alo ma fanau a Samoa, o loo iai avanoa tāua e maua e le autalavou ma nisi foi o mātua e toe faaauau ai a‘oa‘oga i faailoga maualuluga.
O se tasi lenei o mafutaga i totonu o Brisbane o loo galulue faatasi ma nisi Iunivesite aemaise lava o le Iunivesite o Griffith i le tele o tulaga auā manuia mo soo se tasi e iai pea le naunautaiga e fia sailiili atili i le poto faaonaponei.
O le peresitene aoao o le GULL, Polofesa Richard Tier, o se polofesa ua leva ona faiaoga i Oxford University, Polofesa Ortrum, Polofesa John Wicks, Dr Judith Kearney faatasi ai ma le laulau-a-fono o le Leo o Tagata Samoa na iai i le fonotaga lea.
Ua toe amataina aoga o lenei tausaga, ma o loo logologo puialii atu pea e le failautusi o le Leo o Tagata Samoa, le susuga ia Vaaaoao Salumalo Alofipo ma le mafutaga, i luga o le Penina o Asuisui 1197am, i le mamalu o Samoa ma faailoa atili e iai lava le fesoasoani pe a fia manaomia vaega tau nonoga tupe e fesoasoani atu ai mo le faatupeina o a‘oa‘oga ma nisi lava vaega, ae lelei lava le aua le nofoai manū o maua nei avanoa faaauro.
O le agaga fiafia ona e lei umi se taimi talu ona tulai mai lea Mafutaga ae ua iloga foi lona tulai mai i soo se galuegafai e ala i tautua atunuu.
Mo le silafia, o le Leo o Tagata Samoa sa taulamua i le faaleleiga poo le ifoga i le atunuu o Apoliki, i le faalavelave na tulai mai i le va o talavou Samoa, lea na maliu ai se alii i le 2008, e pei ona iai pea nisi fanau i le toese i le taimi nei.
Ua taunuu ai le muagagana foi la lea, “E leotele lava galuega” ma o le ‘auga lava lea, ina ia aogā pea nei mafutaga e tali ai le manaomia o tagata lautele o Samoa.
Faamanuia pea le Atua i tou galuegafai mo le lumanai!
