Ua amata nei ona faatino galuega faasamaria agalelei a le kamupani lafo tupe faamomoli o le Pacific Eazy Money Transfer i Samoa ma Niu Sila, ona o le fia fesoasoani i nisi o faalapotopotoga tuma‘oti ma ekalesia o loo feagai ma auaunaga mo tagata lautele. Faaalia e le alii pule le tofa Faimalo Allan Stowers Ah Kau, e lē o le taimi muamua lenei ua faia ai e le latou kamupani lafo tupe faamomoli ni galuega faasamaria.
O nai tausaga e lei mamao atu sa latou foai ai foi se seleni mo le nofoaga o Tamaitaisa monike i Vailima e fesoasoani ia latou sailiga seleni mo le faatuina o le nofoaga o monike i Tonga.
Sa foai foi e le Pacific Eazy Money se seleni mo le Toomaga mo Tagata Puapuagatia, le nofoaga o tagata matutua i Mapuifagalele, ma Magele i Aukilani, le suegatupe mo le taotoga o Baby Miracle, ma le Retreat Center i Vaoala. Sa ave foi le latou fesoasoani i le polokalame 13 aso o pesepesega o le Kerisimasi a le EFKS o le Puaseisei i Magele.
O le tausaga nei ua aga’i le galuega faasamaria agalelei a le kamupani i le faia o se lulu poo se raffle e saili ai ni seleni e tuuina atu i le Toomaga mo e Puapuagatia, 13 aso a le EFKS i Magele Aukilani, Misionare o le Faatuatua ma Monike i Vailima. “O le naunauta’iga lava lea o le matou kamupani ia ave le fesoasoani mo faalapotopotoga tumaoti o loo ofoina se galuega lelei mo tagata lautele i soo se mafatiaga o aafia ai”.
O le finagalo lea o le alii pule le fetalaiga Faimalo ina ua maua se avanoa e faatalatalanoa ai a’o i Samoa mo le tapenaina o le faamoemoe.
E $5 tala le tau o le pepa lulu i Samoa ae $3 tala tupe NZ o loo faatau ai i nofoaga uma ma lala o le kamupani i Aotearoa.
O loo maua nei pepa i nofoaga o le Pacific Eazy Money Transfer ma e $10,000 se seleni o le a faaalu i faailoga e tolu.
E $5,000 le manumalo, tulaga lua e $3,000 ma le faailoga tolu e $2,000.
O le aso 17 o Iuni 2011 ua faamoemoe e se‘i ai lenei lulu i le vaavaaiga a leoleo ma o le a auai foi i lea aso ma sui o faalapotopotoga tuma‘oti ua lautogia i le fesoasoani mo le tauaaoina i ai o a latou siakitupe e lei faamautuina i le taimi nei pe ta‘i fia le aofai. “O le a talosagaina foi matagaluega a le Malo, Pisinisi Tuma‘oti, tagata taitoatasi e fesoasoani i lenei galuega lelei e fesoasoani ai i le SVSG ma nei faalapotopotoga. O tupe uma o le a maua i lenei Lulu o le a tuuina atu i nei faalapotopotoga”, na saunoa ai le alii pule ia Faimalo.
Soo se pisinisi ma faalapotopotoga o loo fia fesoasoani i lenei galuega lelei e talia ma le fiafia faatasi ai ma le faalauiloaina o le latou foai mai lea taimi i lea taimi i ni faatalatalanoaga ma faasalalauga aemaise i le po, o le a se‘iina ai lenei faamoemoe.
