Ua toe ave e le faamasinoga le isi avanoa i le Minisita o Aoga Taaloga ma Aganuu, le Afioga Magele Mauiliu Magele, ma lana loia le susuga Faaolesa Katopau Ainuu, e tuuina atu ai tali tusitusia i tuuaiga o faiga solitulafono i le faiga palota tele a le atunuu na faia i le aso 4 o Mati o le tausaga nei.
O le faaiuga lea e ala i se talosaga a le alii minisita ma lana loia. Peitai o le isi vaega o le talosaga ina ia tatala atu ma le avanoa e toe faila atu ai ma tuuaiga poo counter allegations, faasaga i lē o loo tagi le tofa Pauli Pipi Tevita, ua lē talia.
O lona uiga ua na o tuuaiga a le itu tagi o le a tali i ai le minisita, ae ua lē avanoa ni ana moliaga o faatosina faasaga ia Pauli o se sui sa tauva mo le Tautua Samoa mai le itumalo o Faasaleleaga numera tasi ae e lei manuia.
Ua mafua ona faia le faaiuga ona ua leva ona mae‘a le taimi faatulagaina na aiaia e le faamasinoga e faaoo atu ai molimau tusitusia uma a itu o faamasinoga o le palota e aofia ai ma tuuaiga a sui o loo faasaga i ai tagi o le palota.
O le lē talia o se isi taimi faaopoopo mo le minisita ma lana loia mo ni tuuaiga faasaga i le itu tagi, e atagia manino mai ai, o le a na o moliaga a Pauli o le a sauni mai i ai le minisita e puipui lona tulaga mamā atoatoa mai ia tuuaiga.
O ana molimau foi o le a lagolagoina lana mau tetee pe a oo ina suesueina le mataupu. O le ta o le 4 o le afiafi o le Aso Lulu, 20 o Aperila na tuuina atu e le faamasinoga i le loia a le minisita o Aoga e tatau ona oo uma atu ai molimau tusitusia.
Ua faailoa e le loia a le minisita le susuga Faaolesa Katopau, na tuai ona ia tuuina atu tautinoga tusitusia e ala i molimau faasaga i tuuaiga, faapea ni molimau o tuuaiga faasaga i le itu tagi, ona sa faatalatalanoa i le va o Pauli ma Magele le ono ave i tua o le tagi. Peitai e lē o iai se fuafuaga e faia sea tulaga.
O afioga uma i faamasino o le Faamasinoga Maualuga e aofia ai ma le Faamasino Sili o loo nafa ma tagi o le palota, na o latou soalaupuleina le talosaga a le loia a le minisita o Aoga.
O i latou ia e aofia ai le Faamasino Sili, Patu Tiavaasue Falefatu Sapolu, Lesatele Rapi Vaai, Vui Clarence Nelson, ma Justice Pierre Slicer, o se faamasino mai Ausetalia o loo galue i se tulaga lē tumau mo le tauaveina o tiute faamasino o le Faamasinoga Maualuga.
O le tagi tau palota mai le itumalo o Vaisigano numera tasi na mae‘a fofogaina molimau i le Aso Gafua, 18 o Aperila 2011, ae o le Aso Lulu, 20 o Aperila lava na tuuina atu ai finauga faaletulafono mulimuli poo final submissions a loia a itu e lua.
E lē o iloa se aso e mae‘a ai le faamasinoga tau palota mai Anoamaa i Sasae i le va o Moefaauo Lufilufi ma le faipule o Alai‘asa Schwarts Hunt. Tasi lea faamasinoga e fai si toatele o molimau a le itu tagi faapea le itu a le faipule o loo faasaga i ai tuuaiga o faatosina solitulafono o le palota.
