“Ia Tapenapena Agaga, auā le Toe Afio mai o Iesu, e ala atu i Upu a le Atua”. O le auga lea na faavaeina ai lenei mafutaga i le 2007, lea na talimalo ai Sydney i le vaiaso atoa.
E ui lava ona o le suafa o le Ekalesia o le uluai tapuaiga Samoa i Ausetalia, ae o le Atua ma lona alofa, ua lauolaola ai lana galuega. Ua salalau ma faatupuina ai i Niu Sila, Brisbane ma Hawaii.
O le afioga i le Peresitene Pastor Lepu‘e Finau, na uluai taitaiina lenei mafutaga, mai le 2007, ma o lea foi ua faamanino mai, o le tofiga lenei e tumau, pe e lē toe palotaina pe mafai ona toe suia.
O ia foi o le taitaifono o le mafutaga a faafeagaiga Pasefika mai fata faitaulaga eseese ua faaigoaina o le Breakthru in Christ. O nisi o a latou polokalame, o asiasiga lea i le falepuipui i Parklea, ta‘i faalua i le masina, o le tilivaina o falaoa mo aiga matitiva, ma a latou fonotaga ma leoleo, auā le talanoaina o ni auala e faaleleia ai olaga o tupulaga talavou.
Ou te mautinoa e lē faapito lana auaunaga, ona o se tamalii e tausaafia, ma faamasani tagata, aemaise lona naunautai atu i agaga o i latou o loo taasē.
O Pastor Lagafua Afoa mai Liverpool, o le failautusi aoao, ae o Pastor Maugatuli Galuvao mai Brisbane o le teutupe aoao. O faafeagaiga nei ma o latou faletua. Hastings NZ: Pastor Fomai Faaofo ma le faletua ia Epenesa. Brisbane: Pastor Maugatuli Galuvao ma le faletua ia Lili. Pastor Iose Lalau ma le faletua ia Motina.
Liverpool: Pastor Lagafua Afoa ma le faletua ia Lo. Penrith: Pastor Kalama Moala ma le faletua ia Fualaau. Mt Druitt: Pastor Lepu‘e Finau ma le faletua ia Makerita. E lei mafai ona auai Hawaii, ona o nisi itu e lē mafai ona faailoaina.
O le uluai aso o le Koneferenisi, lea na laulogo ai Lethbridge Park Hall, poo le nofoaga tu totonu, na faamautu uma i ai polokalame mo le vaiaso, i viiga matagofie o lo tatou tamā o i le lagi, a o molimoli atu talosaga faafetai, ona ua potopoto ma le manuia ana auauna ona o lona alofa mutimutivale.
O se feau tāua, na avea ma mau o lea aso, e faapea, “O le Aso Lenei, e lē o Ananafi, e lē o Taeao, ae o le Asō, poo le Taimi Nei”.
Manaia le timaiga muamua, e avea ma se luitau e mafaufau toto‘a i ai, ona ua solomua i tatou i le toe tepa i tua e pei o le fafine manaomea na liu tupua, pe o le naunautai foi i miti faalelalolagi, poo ni oloa mo le lumanai, ae galo nimo le taimi nei. Ua tatau ona tatou ola mo le asō ma taumafai i se galuega e tauia ai le agalelei o le Atua.
O i tatou Samoa, o ni tagata e mitamita ia tatou aganuu, ma a mae‘a ona faamuamua viiga i le Atua, ona tatou alo atu lea i ni faaaloaloga faaleaganuu e tatalaina ai ni mafutaga faapenei.
O lea na tatau ma onomea ai le ‘ava o feiloaiga, lea na nafa ma Mt Druitt. O le itu e sili ona mataina o le tupulaga, ma lo latou taumafai atu e faatino le tautuaina o lenei measina, auā o le toatele ailoga ua oo i Samoa.
O le augafaapae o le aso o le tamaitai o Losa Paese; o lē na faasoasoaina le ‘ava o Europa Jr Europa, ma si taulealea aupito i laititi o le autalavou o Tana na ia tautuina le ‘ava.
O le Aso Gafua na faataunuuina ai le feiloaiga, Aso Lua seia paia le aso mulimuli o le mafutaga na faamamafa ai a latou polokalame i vaega e lua.
O A‘oa‘oga Tusi Paia ma Polokalame a le Tupulaga. O le Aso Lua na molimauina le faatumulia o lea po, i le fia maimoaina o tapenapenaga a le fanau, i le faatinoina o a latou faafiafiaga faaleagaga.
E fai o le matagofie o sauniuniga a autalavou eseese ae o le talenia o i latou. Na matuā ofo le loto i le matagofie foi o viiga o le Atua na lagiina e i latou na fai ma sui, aemaise le autalavou a Liverpool lea na peseina le sauniga atoa.
Na faagasolo polokalame mo le vaiaso atoa ma toe taliu i fanua faiga malaga a faafeagaiga ma o latou faletua ma nisi o o latou sui, ina ua mae‘a le sauniga tuufaatasi i le Aso Sa ma le toonai faamavae.
Ae faafetai foi i lenei avanoa ua maua mai ai se upu o le ola mo lo‘u nei tagata, ina ia aua ne‘i faavaivai, pe faatuatua iti, auā poo le ā le leaga o le tagata, o loo faafofoga le Atua, auā e lagona e ia lo‘u leo i soo se nofoaga. Ia tatou alalaga ma le agaga maualalo, ona faaeaina ai lea o i tatou.
Momoli atu le faafetai faale lava i lau afioga le Peresitene Pastor Lepu‘e Finau ma le faletua ia Makerita aemaise a tou susuga i faafeagaiga ma faletua o lenei mafutaga mo lenei valaaulia lē aumaua, ua toe fafagu mai ai lenei agaga na tau faavaivai.
Pei o le uluai mau, “Aua e te toe tepa i tua, pe e te naunau mo a taeao, ae o le asō e tatau ona amata ai ona faafouina lou agaga mo le toe afio mai o lo tatou Faaola”.
