E seāseā ma tau lē maua ni tamā Samoa e faia ni folafolaga, ina ne‘i lē taunuu ona avea lea ma lape, masalo e moni e iai ae faaletele.
E alolofa faamaoni peitai o nisi e lē faia ni folafolaga auā e talitonu e iu ina lē taunuu ona fai lea ma alofaga e amata ai se vevesi pe talitonugata ai foi ma ponapona‘ia ai taualumaga o le olaga.
O nisi na o le fia ta‘u lava i le teine i popofou o le mafutaga o ia e kelē ga‘uā le pa povi, 6 pasi, 7 vaafagota ma le maumaga e fia afe eka, ina ia mailei mai ai ma tali mai ai i le fanoga, ona faagata ai lea iinā o lena vasega, ae nonofo ane e augapiu ma se mea e tasi.
E suamalie a niu aati la lea faamatalaga, ma o le lagona lava e oso ane, na o le toe fia mou ese ai e pei ua ova se faalukuluku o se isi faapena.
Atonu o le ala lea e lē muta ai le felelei o ipu ma taei faamalama o taavale a nisi o ulugalii.
Peitai o se folafolaga moni, na folafola e Levaopolo Leala‘isalanoa Iuli i si ana manamea o Luisa i le uluai taimi na la fetaui ai ma mafuta, “Afai ta te nonofo, e te lē faigaluega i lou olaga atoa.”
O se feagaiga foi sa tausisia pea e oo mai i le taimi nei, o se molimau faamaoni lea na lologo ai ma sioa le auvalaaulia i le Aso Toonai na tea nei a o faamatalaina e Luisa (faletua o le tamā ia Levaopolo sa faamanatuina lona 90 tausaga).
Na lagonaina le tele o le magamagagu “auoi kai laki Luisa ia” o le tala moni, auā e toatele nisi o le aiga o loo molimauina le alofa faapelepele o lenei tamā i si ona faletua.
O se mafutaga foi e tumau ai pea le alofa moni.
Na ta‘ua e le faletua o Luisa, tailo lava i nisi ulugalii ae o ia e lē mafai ona vavae ese le faamaoni o lana tausiga ia Levaopolo o si ana tautoga, ona talu ona faaipoipo atu i ai, e lei iloa e lona olaga poo ua ulu i se falefaigaluega, pau lava le manatu o le toeaina na o le nofo i le fale e vaai tamaiti ae faitalia o ia ma saili seleni e tausi ai le aiga.
Ua lausilafia lea tamā faipisinisi i Niu Sila i la foi taimi a o lei malaga mai i Ausetalia nei.
Na tumutumu le Ekalesia faapea aiga atoa ma uo i le faamanatuina o le 90 tausaga o le tamā ia Levaopolo Leala‘isalanoa, i le faleaiga a le Richlands Hotel. Sa taitaia le sauniga e le faafeagaiga ia Ierepoamo Savaiinaea.
O le fofoga o le aso, o le alo lava o le tamā ia Levaopolo ma Luisa, le susuga ia Taito John Taamilosaga Iuli.
O Levaopolo Leala‘isalanoa Iuli e mai le alalafaga o Falefa ma le faletua ia Luisa Iuli mai Salailua & Talimatau.
O lea lava foi aso tāua na faamanatuina ai i le aso 23 o Aperila le 32 tausaga (Anniversary) talu ona mafuta ma faatasia lea ulugalii fealofani.
Manuia tele le aso soifua ma le Anniversary Levaopolo Leala‘isalanoa ma Luisa Iuli!
